តុលាការក្រុងហូជីមិញបានកាត់ទោសប្រហារជីវិតមេគ្រឿងញៀនវៀតណាមម្នាក់ និងមនុស្សក្រោមឱវាទចំនួន ២៦ នាក់កាលពីថ្ងៃសុក្រពីបទជួញដូរគ្រឿងញៀន ដែលជាករណីមួយដែលមានចំនួនអ្នកដែលត្រូវបានកាត់ទោសប្រហារជីវិតច្រើនបំផុតនៅក្នុងប្រទេសវៀតណាមក្នុងទសវត្សរ៍កន្លងមក។តុលាការ​បាន​រក​ឃើញ​ថា មនុស្សប្រមាណ ​៣៥​នាក់​បាន​រត់ពន្ធ​គ្រឿងញៀន ​៦២៦​គីឡូក្រាម​ពីប្រទេស​កម្ពុជា​ទៅ​ប្រទេស​វៀតណាម​ អំឡុងខែមីនា​ឆ្នាំ​២០១៨​ដល់ ​ខែវិច្ឆិកា​ឆ្នាំ​២០២២។

លោកស្រី Vu Hoang Oanh ត្រូវបានគេស្គាល់ថា Oanh Ha អាយុ ៦៧ ឆ្នាំ ដែលជាមេក្លោង និងជាមេដឹកនាំបណ្តាញ ត្រូវបានកាត់ទោសពីបទជួញដូរគ្រឿងញៀនខុសច្បាប់ និងពិន័យជាប្រាក់ចំនួន ២០០ លានដុង (៧៨៥៥ ដុល្លារអាម៉េរិក)។ អ្នកក្រោមឱវាទចំនួន ២៦ នាក់ត្រូវបានកាត់ទោសប្រហារជីវិតពីបទឧក្រិដ្ឋកម្មជួញដូរ ដឹកជញ្ជូន ឬរក្សាទុកគ្រឿងញៀនខុសច្បាប់។ សមាជិក ៦ នាក់ផ្សេងទៀត បានទទួលការកាត់ទោសជាប់ពន្ធនាគារអស់មួយជីវិត និងពីរនាក់ទៀតត្រូវបានកាត់ទោសឲ្យជាប់ពន្ធនាគារ២០ ឆ្នាំ។

​គួរបញ្ជាក់ផងដែរថា វៀតណាម​មាន​ច្បាប់​គ្រឿងញៀន​តឹងតែង​បំផុត​ក្នុង​ពិភពលោក។ អ្នកដែលត្រូវបានផ្តន្ទាទោសពីបទកាន់កាប់ ឬរត់ពន្ធហេរ៉ូអ៊ីនលើសពី ៦០០ ក្រាម ឬកូកាអ៊ីន ឬមេតំហ្វេតាមីនលើសពី ២,៥ គីឡូក្រាម ប្រឈមនឹងការកាត់ទោសប្រហារជីវិត៕