សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖១. ទីបំផុតអតីតឧកញ៉ា ស្រី ស៊ីណា ត្រូវជាប់ពន្ធនាគារ ៣១ឆ្នាំ និងសងសំណងជាង ២លានដុល្លារដល់គ្រួសារជនរងគ្រោះ

សាលាដំបូងរាជធានីភ្នំពេញ សម្រេចផ្ដន្ទាទោសជនជាប់ចោទ ស្រី ស៊ីណា ឲ្យជាប់ពន្ធនាគាររយៈពេលសរុប ៣១ឆ្នាំ និងបង្គាប់ឱ្យសំណង ២លានដុល្លារដល់ឪពុក-ម្ដាយជនរងគ្រោះដែលបានបាត់បង់ជីវិត និង ៥០ម៉ឺនដុល្លារដល់អ្នករងរបួស។

២. សម្តេចធិបតី ហ៊ុន ម៉ាណែត បានផ្តល់អនុសាសន៍ណែនាំជាទិសដៅការងារ ៧ចំណុច ដល់ក្រុមប្រឹក្សាអភិវឌ្ឍន៍កម្ពុជា

សម្ដេចធិបតីណែនាំឲ្យបន្តអនុវត្តយន្តការពិគ្រោះយោបល់ជាមួយសហភាគី ក្នុងក្របខណ្ឌក្រុមប្រឹក្សាអភិវឌ្ឍន៍កម្ពុជា ឲ្យបានពីរដងក្នុងមួយឆ្នាំ។

៣. លោក ស៊ូ ចាយ អធិការស្រុកដំណាក់ចង្អើរត្រូវបានដកហូតតួនាទីឲ្យមកនៅត្រឹមជាមន្ត្រី

អតីតអធិការនគរបាលស្រុកដំណាក់ចង្អើ ខេត្តកែប លោក ស៊ូ ចាយ ត្រូវបាន រដ្ឋមន្ត្រីក្រសួងមហាផ្ទៃ ដកហូតមុខតំណែងពីអធិការនៃអធិការនគរបាលស្រុកដំណាក់ចង្អើរឲ្យមកជាមន្ត្រី។

៤. នគរបាលប្រឆាំងបទល្មើស បង្រ្កាបផលិតផលគ្រឿងក្នុងជ្រូកខូចគុណភាពជាង ៧០០គីឡូក្រាម

ក.ប.ប បង្រ្កាបករណីចែកចាយផលិតផលគ្រឿងក្នុងជ្រូកដឹកតាមម៉ូតូរ៉ឺម៉កផ្ទុកជាង ៧០០គីឡូក្រាម ខូចគុណភាព គ្មានសុវត្ថិភាព បង្កប៉ះពាល់សុខភាពប្រជាពលរដ្ឋនៅ ខណ្ឌប្ញស្សីកែវ រាជធានីភ្នំពេញ។

៥. ភ្នំភ្លើងដ៏សកម្មបំផុតមួយរបស់ពិភពលោក Kilauea របស់ហាវ៉ៃត្រូវបានផ្ទុះឡើងម្តងទៀត

កម្អែលភ្នំភ្លើងបានចាប់ផ្តើមផ្ទុះឡើងកាលពីថ្ងៃច័ន្ទ តាមរយៈសំបកនៃភ្នំភ្លើងដ៏សកម្មបំផុតមួយរបស់ពិភពលោក ដែលមានឈ្មោះថា Kilauea ស្ថិតនៅលើកោះដ៏ធំមួយរបស់ហាវ៉ៃ។

៦. គុណភាពខ្យល់នៅក្នុងសង្កាត់ទាំង ៥០ នៃទីក្រុងបាងកក គឺទាបជាងស្តង់ដារសុវត្ថិភាពជំរុញឲ្យប្រជាជនបាងកកពាក់ម៉ាសពេលចេញពីផ្ទះ

មជ្ឈមណ្ឌលព័ត៌មានគុណភាពខ្យល់របស់រដ្ឋបាលក្រុងបាងកក (BMA) បាននិយាយថា គុណភាពខ្យល់នៅក្នុងសង្កាត់ទាំង ៥០ នៃទីក្រុងបាងកក គឺទាបជាងស្តង់ដារសុវត្ថិភាពនៅថ្ងៃអង្គារនេះ។

៧. សម្តេចធិបតី ហ៊ុន ម៉ាណែត បានផ្តល់អនុសាសន៍ណែនាំជាទិសដៅការងារ ៧ចំណុច ដល់ក្រុមប្រឹក្សាអភិវឌ្ឍន៍កម្ពុជា

យោងតាមសេចក្តីប្រកាសព័ត៌មាន ក្រុមប្រឹក្សាអភិវឌ្ឍន៍កម្ពុជា នាថ្ងៃទី២៣ ខែធ្នូនេះ បានឲ្យដឹងថា ក្នុងកិច្ចប្រជុំខាងលើ សម្តេចធិបតី ហ៊ុន ម៉ាណែត បានផ្តល់អនុសាសន៍ណែនាំជាទិសដៅការងារទាំង ៧ចំណុច។

៨. អគ្គស្នងការនគរបាលជាតិ ណែនាំឲ្យដកហូតបណ្ណបើកបរយានយន្តដែលអស់ពិន្ទុ ឬពិន្ទុសូន្យ ចាប់ពីថ្ងៃទី១ ខែមករា ឆ្នាំ២០២៥ តទៅ

អគ្គស្នងការនគរបាលជាតិបានចេញសេចក្តីជូនដំណឹងស្តីពីការអនុវត្តដកបណ្ណបើកបរយានយន្តដែលអស់ពិន្ទុ ឬពិន្ទុសូន្យ ដើម្បីបង្កើនប្រសិទ្ធភាពនៃការ រឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក។

៩. សត្វក្តាន់ ក្លាយជាសត្វដែលខ្សត់នៅក្នុងប្រទេសជិតខាង តែកម្ពុជាមានច្រើនទៅវិញ

សត្វក្តាន់គឺជាប្រភេទថនិកសត្វដែលធ្លាប់រស់នៅតំបន់ដីសើម និងវាលស្មៅនៅតំបន់អាស៊ីអាគ្នេយ៍។ បើតាមអង្គការ WWF កម្ពុជា បានឱ្យដឹងនៅថ្ងៃទី២៣ ខែធ្នូ ឆ្នាំ២០២៤នេះថា មានកត្តាប្រឈមជាច្រើនរបស់សត្វកម្រប្រភេទនេះ ដូចជាការបាត់បង់ទីជម្រក ការធ្លាក់ចុះនៃចំនួនសត្វក្តាន់ និងការបរបាញ់ បានជំរុញឱ្យសត្វក្តាន់ ឈានដល់ការផុតពូជនៅក្នុងប្រទេសថៃ ឡាវ វៀតណាម និងចិន។

១០. JB មកកម្ពុជាជាលើកទី៣ ដើម្បីជួយផ្សព្វផ្សាយវប្បធម៌ខ្មែរ

ជាងកាត់សក់វ័យក្មេងដ៏ល្បីលើពិភពលោក JB បានវិលត្រលប់មកប្រទេសកម្ពុជាជាថ្មីម្ដងទៀត ក្នុងគោលបំណងជួយផ្សព្វផ្សាយវប្បធម៌ខ្មែរ ក៏ដូចជាទេសចរណ៍កម្ពុជាឲ្យកាន់រីកសុះសាយ។