ខេត្តសៀមរាប៖ អាជ្ញាធរស្រុកជីក្រែងបានអះអាងថា ក្នុងចំណោមឃុំទាំងអស់ របស់ស្រុក មានតែឃុំជីក្រែងមួយប៉ុណ្ណោះដែលពលរដ្ឋខ្វះទឹកប្រើប្រាស់។ ប៉ុន្តែមិនមានបញ្ហាធំដុំទេ ព្រោះអាជ្ញាធរបានចាត់វិធានការចែកទឹកជូនពកគាត់បានទាន់ពេលវេលា។

ថ្លែងប្រាប់តាមទូរស័ព្ទកាលពីរសៀល ថ្ងៃទី២៥ ខែមេសាឆ្នាំ២០១៩ លោកពៅ ប៊ុនធឿន អភិបាលស្រុកជីក្រែង បានអះអាងថា ដោយសារតែការកើនឡើងកម្តៅខ្លាំង បានធ្វើឲ្យផ្នែកខ្លះនៃឃុំជីក្រែង ទទួលរងការប៉ះពាល់ ប៉ុន្តែអាជ្ញាធរបានប្រើប្រាស់រថយន្តពន្លត់អគ្គីភ័យរបស់អធិការដ្ឋាននគរបាលស្រុកដឹកទឹកយកទៅចែកជូនដល់ប្រជាពលរដ្ឋប្រានប្រើប្រាស់។”ខ្វះទឹកហ្នឹងទើបតែកើតដែរទេ ព្រោះស្រះលោកវារីង ចឹងយើងបានប្រើរថយន្តរបស់អធិការដ្ឋាននគរបាលស្រុកដឹកទឹកចែកពួកគាត់”។

លោកអភិបាលស្រុកជីក្រែង បន្តឲ្យដឹងថា ឃុំជីក្រែង ជាទីតាំងមួយដែលខ្វះប្រភពទឹកក្រោមដី ។ លោកថា កន្លងទៅក្រសួងអភិវឌ្ឍន៍ជនបទ បានជីកអណ្តូងទឹក ដែលមានជម្រៅដល់ទៅ២០០ម៉ែត្រ ជូនប្រជាពលរដ្ឋគ្រប់ភូមិទាំង១២ក្នុងឃុំ ប៉ុន្តែនៅតែមិនមានទឹកប្រើប្រាស់ទៀត។ ដូច្នេះដើម្បីដោះស្រាយបញ្ហានេះ អាជ្ញាធរបានចុះសិក្សារអំពីទីតាំងជីកស្រះទឹកជូនប្រជាពលរដ្ឋវិញ៕

ជា ស្រស់