ថ្ងៃក្រុមការងារខ្មែរណូតយើងខ្ញុំ បានទៅផ្តិតរូបថតប្រាសាទមួយដែលស្ថិតនៅក្នុងខេត្តព្រះវិហារ ហើយប្រាសាទនេះជាប្រាសាទមួយ ដែលមិនសូវមានភ្ញៀវជាតិ និងអន្តរជាតិបានទៅដល់ណាស់ ព្រោះវានៅឆ្ងាយពីទីប្រជុំជន។ បើយើងជិះពីខេត្តសៀមរាបទៅ វាមានចំងាយប្រហែលជា ៧២គីឡូម៉ែត្រ និងប្រើរយៈពេលប្រហែលជា ១២០នាទី តែបើយើងជិះពីខេត្តព្រះវិហារទៅ ប្រាសាទនេះមានចំងាយ៤៩គីឡូម៉ែត្រ បើធ្វើដំណើរតាមផ្លូវលេខ២១១ និងផ្លូវលំ។ ប្រាសាទនេះមានឈ្មោះថា ប្រាសាទធំ ដែលប្រជាជនភាគច្រើនហៅប្រាសាទនេះថា ប្រាសាទកោះកេរ ឬ កោះកេរ្តិ៍។ តាមពិតទៅឈ្មោះកោះកេរ គឺជាឈ្មោះរបស់ទីក្រុងនៅសតវត្សទី១០ មិនមែនជាឈ្មោះប្រាសាទនោះទេ។

បន្ថែមពីនេះទៅទៀត ប្រាសាទធំ គឺជាប្រាសាទដែលមានកំពស់ខ្ពស់ ដោយសង់លើដីផ្ទាល់ និងមាន៧ជាន់ ហើយមានរាងដូចប្រាសាទពីរ៉ាមីតនៅក្នុងប្រទេសអេស្សុីប។ ដោយប្រជាជនយើងខ្លះហៅប្រាសាទធំថា ពីរ៉ាមីតខ្មែរ។ តាមអ្នកនៅតំបន់នោះបានបន្ថែមថា ពីដើមឡើយនៅលើកំពូលប្រាសាទមាន រូបលិង្គដ៏ធំ ដែលគេតំកល់នៅលើប្រាសាទសម្រាប់បូជានិងធ្វើពិធីសាសនារបស់ស្តេច ព្រោះប្រាសាទធំ គឺជាប្រាសាទរាជរបស់ព្រះបាទជ័យវរ្ម័នទី៤ផ្ទាល់។ តាមឯកសារ និងសម្តីរបស់មគ្គុទេសនៅតំបន់នោះបានអោយដឹងថា ក្រុមប្រាសាទកោះកេរ ឬកោះកេរ្តិ៍ ជារាជធានីចាស់របស់ព្រះបាទជ័យវរ្ម័នទី៤ ដែលទ្រង់បានលើករាជធានីពីទីក្រុងអង្គរនៅចន្លោះឆ្នាំ (៩២៨-៩៤២)។ គ្រានោះដែរព្រះអង្គបានសាងសង់ ប្រាង្គប្រាសាទជាច្រើនរហូតដល់រាប់រយប្រាសាទ នៅក្នុងផ្ទៃដី ៩គីឡូម៉ែត្របួនជ្រុង ឬ៨០០០ហិចតា ប៉ុន្តែនាពេលសព្វថ្ងៃនេះភ្ញៀវទេសចរ អាចចូលទស្សនាមើល បានតែប្រាសាទមួយចំនួននោះទេ ព្រោះប្រាសាទមួយចំនួនស្ថិតនៅក្នុងព្រៃជ្រៅ ដូចនេះវាមិនសូវមានសុវត្ថិភាពសម្រាប់ភ្ញៀវទេសចរណ៍ទេ។ បើយោងតាមសិលាចារឹករបស់ទីក្រុងចំណាស់មួយនេះ បានអោយដឹងថា ឈ្មោះទីក្រុងកោះកេរ ឬកោះកេរ្តិ៍ មានឈ្មោះដើមថា ”លិង្គបុរៈ” មាននៃថា ទីក្រុងលិង្គ ដែលតំណាង និងឧទ្ទិសដល់សាសនា Hindu។ ដូចនេះក្នុងនាមយើងជាកូនខ្មែរ បើសិនជាមានពេលសូមចូលទៅទស្សនាទីក្រុងចំណាស់មួយនេះផង ដើម្បីលើកស្ទួយប្រាសាទបុរាណ និងជួយដល់សហគមន៍ ប្រជាជនដែលរស់នៅក្នុងតំបន់នោះផងដែរ៕