រដ្ឋមន្ត្រីការបរទេសអ៊ីរ៉ង់ លោក Abbas Araqchi បានមកដល់រដ្ឋធានីអ៊ីស្លាម៉ាបាដរបស់ប្រទេសប៉ាគីស្ថាន នៅថ្ងៃសុក្រ ទី២៤ ខែមេសា ឆ្នាំ២០២៦ ដើម្បីពិភាក្សាអំពីសំណើសម្រាប់ការចាប់ផ្តើមការចរចាសន្តិភាពឡើងវិញជាមួយសហរដ្ឋអាមេរិក ចំពេលមានសញ្ញាផ្ទុយគ្នាអំពីថាតើលោកនឹងជួបជាមួយអ្នកចរចាអាម៉េរិកនៅទីនោះឬអត់។ 

ប្រភពព័ត៌មានប៉ាគីស្ថានបាននិយាយថា លោក Abbas Araqchi មិនត្រូវបានគ្រោងនឹងជួបជាមួយអ្នកចរចាអាម៉េរិកនៅអ៊ីស្លាម៉ាបាដទេ ខណៈដែលលេខាធិការសារព័ត៌មានសេតវិមាន លោកស្រី Karoline Leavitt បាននិយាយថា បេសកជនពិសេស Steve Witkoff និងលោក Jared Kushner នឹងចាកចេញទៅកាន់ប្រទេសប៉ាគីស្ថាននៅព្រឹកថ្ងៃសៅរ៍ ដើម្បីពិភាក្សាជាមួយមន្ត្រីអ៊ីរ៉ង់។​

រដ្ឋមន្ត្រីការបរទេសប៉ាគីស្ថានបានបញ្ជាក់ពីការមកដល់របស់គណៈប្រតិភូអ៊ីរ៉ង់ ដោយនិយាយថា លោក Araqchi នឹងជួបជាមួយមន្ត្រីជាន់ខ្ពស់ប៉ាគីស្ថាន ដើម្បីពិភាក្សាអំពីកិច្ចខិតខំប្រឹងប្រែងសន្តិភាព។

លោក Sheikh Tamim bin Hamad Al Thani របស់ប្រទេសកាតា បានពិភាក្សាអំពីការអភិវឌ្ឍនៅក្នុងកិច្ចព្រមព្រៀងឈប់បាញ់រវាងទីក្រុងវ៉ាស៊ីនតោន និងទីក្រុងតេអេរ៉ង់ ក្នុងការសន្ទនាតាមទូរស័ព្ទជាមួយប្រធានាធិបតីអាម៉េរិក លោក Donald Trump នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋកាតានៅយប់ថ្ងៃសុក្រ។

មេដឹកនាំកាតាបាននិយាយថា ប្រទេសរបស់លោកនឹងបន្តសម្របសម្រួលជាមួយដៃគូដើម្បីគាំទ្រដល់កិច្ចខិតខំប្រឹងប្រែងសម្របសម្រួលដែលដឹកនាំដោយប៉ាគីស្ថាន។ ទីក្រុងអ៊ីស្លាម៉ាបាដគឺជាទីកន្លែងដែលបានគ្រោងទុកសម្រាប់កិច្ចចរចារវាងសហរដ្ឋអាមេរិក និងអ៊ីរ៉ង់ ដែលមិនបានសម្រេចនៅដើមសប្តាហ៍នេះ។

អ្នកនាំពាក្យសេតវិមាន លោកស្រី Karoline Leavitt បានបង្ហាញទឹកមុខរីករាយ ដោយនិយាយថា សហរដ្ឋអាមេរិកបានឃើញវឌ្ឍនភាពមួយចំនួនពីភាគីអ៊ីរ៉ង់ក្នុងរយៈពេលប៉ុន្មានថ្ងៃថ្មីៗនេះ ហើយសង្ឃឹមថានឹងមានច្រើនទៀតនៅចុងសប្តាហ៍នេះ។ លោកស្រីបានបន្ថែមថា អនុប្រធានាធិបតីសហរដ្ឋអាមេរិក លោក JD Vance ដែលកាលពីដើមខែនេះបានដឹកនាំកិច្ចចរចាជុំទីមួយដែលមិនបានសម្រេចជាមួយអ៊ីរ៉ង់ ដើម្បីបញ្ចប់សង្គ្រាមរបស់ពួកគេ បានត្រៀមខ្លួនរួចជាស្រេចដើម្បីធ្វើដំណើរទៅកាន់ប្រទេសប៉ាគីស្ថាន ដើម្បីចូលរួមការចរចា ប្រសិនបើពួកគេទទួលបានជោគជ័យ។

អ្នកនាំពាក្យក្រសួងការបរទេសអ៊ីរ៉ង់បានប្រាប់ប្រព័ន្ធផ្សព្វផ្សាយរដ្ឋនៅពេលក្រោយថា ដំណើរទស្សនកិច្ចនេះនឹងរួមបញ្ចូលការពិគ្រោះយោបល់លើកិច្ចខិតខំប្រឹងប្រែងចុងក្រោយបំផុតដើម្បីបញ្ចប់សង្គ្រាម។ ប្រភពរដ្ឋាភិបាលប៉ាគីស្ថានពីរដែលដឹងពីការពិភាក្សាបាននិយាយថា ដំណើរទស្សនកិច្ចរបស់លោក Araqchi នឹងមានរយៈពេលខ្លី ហើយផ្តោតលើសំណើរបស់អ៊ីរ៉ង់សម្រាប់ការចរចាជាមួយសហរដ្ឋអាមេរិក ដែលអ្នកសម្របសម្រួលប៉ាគីស្ថាន៕