មិនថាក្នុងពេលនៃការប្រារព្ធពិធីបុណ្យចូលឆ្នាំថ្មីប្រពៃណីជាតិ ឬ ឱកាសផ្សេងៗទៀតយុវជន និងប្រជាជនខ្មែរត្រូវស្រឡាញ់ រក្សាថែ ការពារកេរមរតកវប្បធម៌ អរិយធម៌ដូនតាខ្មែរដែលបន្សល់ទុកតាំងពីបុរាណកាលមក។

មិនថានៅក្នុងព្រឹត្តិការណ៍នគរសង្ក្រាន្ត ប៉ុន្តែក៏ដូចជានៅតាមទីកន្លែងនានា ប្រជាជនខ្មែរតែងតែរក្សាបាននូវកេរដំណែលវប្បធម៌ដូនតាដ៏ល្អផូរផង់នេះ ដែលជាអត្តសញ្ញាណជាគ្រឿងអលង្ការជាតិខ្មែរ និងជាប្រពៃណីដូនតាដែលមានតាំងពីយូរលង់មក ដូចជាការលេងល្បែងចោលឈូង បោះអង្គញ់ ទាញព្រ័ត លាក់កន្សែង វាយក្អម និងលោតបាវ និងការរាំលេងកម្សាន្តនូវរបាំប្រជាប្រិយ រួមជាមួយការសម្តែងសិល្បៈបុរាណ ប្រជាប្រិយជាច្រើនទម្រង់។

ថ្វីដ្បិតតែប្រជាជនខ្មែរកំពុងតែប្រតិបត្តិពិធីបុណ្យចូលឆ្នាំថ្មីប្រពៃណីជាតិក៏ពិតមែន តែស្មារតីនៅតែចងចាំក្នុងចិត្តជានិច្ចនូវស្ថានភាពសុខទុក្ខ ព្រមទាំងក្ដីនឹករលឹកដល់កងកម្លាំង ដែលកំពុងឈរជើងរក្សាការពារទឹកដីនៅតាមខ្សែបន្ទាត់ព្រំដែន ក៏ដូចជាបងប្អូន ពូមីង ក្មួយៗ លោកយាយ លោកតា ជាជនភៀសសឹកទាំងអស់៕