នាព្រឹកថ្ងៃទី២៥ ខែមីនា ឆ្នាំ២០២៦ មានហេតុការណ៍ភ្ញាក់ផ្អើលមួយបានកើតឡើងដោយស្ត្រីម្នាក់ត្រូវសត្វសំពោចដែលខ្លួនចិញ្ចឹមខាំបណ្តាលឲ្យរងរបួស នៅតាមបណ្ដោយផ្លូវលេខ 310 ស្ថិតក្នុងសង្កាត់ទួលស្វាយព្រៃទី២ ខណ្ឌបឹងកេងកង។

យោងតាមប្រភពនៅកន្លែងកើតហេតុបានឲ្យដឹងថា សត្វសំពោចនេះត្រូវបានស្ត្រីរងគ្រោះយកមកចិញ្ចឹមក្នុងផ្ទះជារឿយៗ ប៉ុន្តែដោយមិនទាន់ដឹងមូលហេតុច្បាស់ វាបានវាយប្រហារម្ចាស់របស់ខ្លួន ដែលជាហេតុធ្វើឱ្យបងប្អូននៅតំបន់នោះភ័យខ្លាចគ្រប់ៗគ្នា។

ករណីនេះកំពុងធ្វើឲ្យមហាជនលើកឡើងពីហានិភ័យនៃការចិញ្ចឹមសត្វព្រៃ ឬសត្វដែលមានអត្តចរិតមិនស្ថិតស្ថេរ ដោយអាចបង្កគ្រោះថ្នាក់បានគ្រប់ពេលវេលា ប្រសិនបើគ្មានវិធានការការពារត្រឹមត្រូវ។

យ៉ាងណាមិញ អាជ្ញាធរ និងអ្នកជំនាញផ្នែកសត្វសូមណែនាំឲ្យប្រុងប្រយ័ត្នខ្ពស់ មុននឹងសម្រេចចិត្តយកសត្វបែបនេះមកចិញ្ចឹម ដើម្បីជៀសវាងហេតុការណ៍អាក្រក់ដូចនេះកើតឡើងម្ដងទៀតផងដែរ៕