ប៉ូលិសនៅខេត្តហាទិញ ប្រទេសវៀតណាមបានចុះបង្រ្កាបប្រតិបត្តិការបោកប្រាស់មួយដែលផលិតថ្នាំបុរាណចិនសម្រាប់ធ្វើឲ្យឡើងទម្ងន់ក្លែងក្លាយដែលផ្សំពីម្សៅថោកៗជាច្រើនប្រភេទ និងថ្នាំលោកខាងលិច។ អ្នកស្រី ដូន ធី ឡាំ អាយុ ៥៤ ឆ្នាំ និងលោក ដូន កៅ គឿង អាយុ ៤២ ឆ្នាំ រួមជាមួយបក្ខពួក ៣នាក់ ត្រូវបានប៉ូលិសខេត្តហាទីញចាប់ខ្លួន ដើម្បីស៊ើបអង្កេតលើបទល្មើសផលិត និងជួញដូរទំនិញក្លែងក្លាយ ដែលបានចាប់ផ្តើមរោងចក្រផលិតនៅផ្ទះចំនួន២​ខ្នងនៅក្នុងឃុំឌឹកថូ ក្នុងឆ្នាំ ២០២៣។

ក្រុមនេះបានប្រើប្រាស់ម្សៅពោត ម្សៅអង្ករដំណើប និងម្សៅឱសថដែលមិនស្គាល់ប្រភពដើម លាយវាជាមួយឱសថទំនើបៗ រួមមាន Alphamethasone-DHT, Panactol និង Cinarizinជាដើម ។ ពួកគេបានជួលកម្មករក្នុងស្រុកជាច្រើននាក់ក្នុងដំណើការផលិត,វេចខ្ចប់ និងការបិទស្លាកផលិតផលសម្រេច។ថ្នាំក្លែងក្លាយទាំងនោះត្រូវបានលក់នៅលើប្រព័ន្ធផ្សព្វផ្សាយសង្គមផ្សេងៗ ដោយផ្សព្វផ្សាយថា មានប្រសិទ្ធភាពក្នុងការបង្កើនចំណង់អាហារ ជំរុញការគេងលក់ស្កប់ស្កល់ និងបង្កើនទម្ងន់យ៉ាងឆាប់រហ័ស។

នៅចុងខែមករា ប៉ូលិសខេត្តហាទិញបានឆ្មក់ចូល និងឆែកឆេរកន្លែងផលិតថ្នាំពីរកន្លែងក្នុងពេលដំណាលគ្នា ដោយរឹបអូសថ្នាំគ្រាប់ជាង ១តោន, ថ្នាំគ្រាប់រាប់រយពាន់គ្រាប់ និងវត្ថុធាតុដើមជាង ១តោនដូចជា ស្ករត្នោត, ម្សៅពោត, ម្សៅអង្ករស្អិត និងម្សៅឱសថបុរាណចិនដែលមិនស្គាល់ប្រភពដើម។ លទ្ធផលតេស្តបានបង្ហាញថា គំរូថ្នាំមិនមានគ្រឿងផ្សំរុក្ខជាតិដូចដែលបានបញ្ជាក់នៅលើវេចខ្ចប់នោះទេ ហើយសារធាតុនៅក្នុងថ្នាំមិនត្រូវបានអនុញ្ញាតឱ្យចរាចរដោយអាជ្ញាធរទេ។ ទីភ្នាក់ងារស៊ើបអង្កេតមិនទាន់បានចេញផ្សាយបរិមាណថ្នាំដែលលក់នៅលើទីផ្សារ ឬចំនួនប្រាក់ចំណេញខុសច្បាប់នៅឡើយទេ៕