អាជ្ញាធរអាកាសចរណ៍ជាតិវៀតណាមបាននិយាយថា ក្រុមហ៊ុនអាកាសចរណ៍ជាតិនឹងផ្អាកជើងហោះហើរក្នុងស្រុកជាង២០ជើងក្នុងមួយសប្តាហ៍ ចាប់ពីខែក្រោយដោយសារតែការផ្គត់ផ្គង់ប្រេងឥន្ធនៈមានកំណត់ដែលបណ្តាលមកពីសង្គ្រាមមជ្ឈិមបូព៌ា។

តម្លៃប្រេងឥន្ធនៈយន្តហោះបានកើនឡើងយ៉ាងខ្លាំងចាប់តាំងពីការចាប់ផ្តើមនៃជម្លោះជាងបីសប្តាហ៍មុន ដែលបានធ្វើឱ្យតម្លៃប្រេងកើនឡើងខ្ពស់ និងបង្កឱ្យមានការភ័យខ្លាចនៃការខ្វះខាតប្រេងឥន្ធនៈ។ ក្រុមហ៊ុនអាកាសចរណ៍វៀតណាមមានគម្រោងផ្អាកប្រតិបត្តិការជាបណ្តោះអាសន្នលើផ្លូវជាច្រើនចាប់ពីថ្ងៃទី ០១ខែមេសា សរុបចំនួន ២៣ ជើងក្នុងមួយសប្តាហ៍ នេះបើយោងតាមអាជ្ញាធរអាកាសចរណ៍ស៊ីវិលរបស់ប្រទេសនេះបាននិយាយនៅក្នុងសេចក្តីថ្លែងការណ៍មួយនៅយប់ថ្ងៃច័ន្ទ (ថ្ងៃទី២៣ ខែមីនា)។

អាជ្ញាធរបាននិយាយថា ការផ្គត់ផ្គង់ប្រេងឥន្ធនៈយន្តហោះមានកំណត់ (Jet A-1) ដោយសារតែជម្លោះនៅមជ្ឈិមបូព៌ាបានធ្វើឱ្យក្រុមហ៊ុនអាកាសចរណ៍ក្នុងស្រុកប្រឈមនឹងហានិភ័យនៃការខ្វះខាតប្រេងឥន្ធនៈដែលជំរុញឱ្យមានការកាត់បន្ថយជើងហោះហើរ។ ថ្មីៗនេះ ប្រទេសវៀតណាមបានស្នើសុំការគាំទ្រប្រេងឥន្ធនៈពីប្រទេសជាច្រើន រួមទាំងប្រទេសកាតា គុយវ៉ែត អាល់ហ្សេរី និងជប៉ុន ហើយនៅថ្ងៃច័ន្ទ បានចុះហត្ថលេខាលើកិច្ចព្រមព្រៀងជាមួយប្រទេសរុស្ស៊ីលើការផលិតប្រេង និងឧស្ម័ននៅក្នុងប្រទេសទាំងពីរផងដែរ៕