ករណី​អគ្គិភ័យ​ឆាបឆេះ​ផ្ទះ​បងប្អូន​ប្រជាពលរដ្ឋ​មួយ​កន្លែង ដែល​ស្ថិត​នៅ​ទល់មុខ​វត្ត​សន្សំ​កុសល នៅចំណុចផ្លូវ៣៣BT ក្រុម២ ភូមិសន្សំកុសល៣ សង្កាត់បឹងទំពន់១ ខណ្ឌមានជ័យ នាវេលាម៉ោង២០:០៥នាទីយប់ ចំពោះមូលហេតុសមត្ថកិច្ចកំពុងធ្វើការស្រាវជ្រាវ។ 

ហេតុការណ៍​អគ្គិភ័យឆាបឆេះនេះធ្វើឱ្យឆេះផ្ទះឈើលើថ្មក្រោមចំនួន ០១ខ្នង, ហាងលក់ទូរស័ព្ទចំនួន ០២ហាង អស់ទាំងស្រុង រួមទាំងទូរស័ព្ទ, គ្រឿងសម្ភារទូរស័ព្ទអស់មួយចំនួនធំ ហើយរាលដាលឆេះហាងលក់ទូរស័ព្ទចំនួន ០១ហាងខូចខាតដំបូល, ពិដាន និងឆេះរោលដល់ផ្ទះថ្មចំនួន ០១ខ្នង (ខូចខាតអស់១០%)។

នៅវេលាម៉ោង២១:៥០នាទីយប់ ថ្ងៃទីខែឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យរាជធានីភ្នំពេញ ចំនួន ១៨គ្រឿង ប្រេីប្រាស់ទឹកអស់ចំនួន ១៨ឡាន ស្មើរនឹង ៧២ម៉ែត្រគូប, រថយន្តអគ្គិភ័យកងរាជអាវុធហត្ថចំនួន ០១គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៤ម៉ែត្រគូប, រថយន្តអគ្គិភ័យក្រមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៦ម៉ែត្រគូប, រថយន្តអគ្គិភ័យOCICទីក្រុងកោះពេជ្រចំនួន ០៣គ្រឿង ប្រើប្រាស់ទឹកអស់ចំនួន ០៣ឡាន ស្មើនឹង ១២ម៉ែត្រគូបផងដែរ៕