ទីភ្នាក់ងារសារព័ត៌មានបរទេសបានរាយការណ៍ថា វេជ្ជបណ្ឌិតនៅមន្ទីរពេទ្យមួយក្នុងទីក្រុងម៉ូស្គូ ប្រទេសរុស្ស៊ី បានចែករំលែកនូវករណីវេជ្ជសាស្រ្ដដ៏រន្ធត់មួយដែលត្រូវបានផ្សព្វផ្សាយទុកជាមេរៀនសម្រាប់ឪពុកម្តាយ ត្រូវយកចិត្តទុកដាក់លើឧបករណ៍សម្រាប់កូនៗលេង ជៀសវាសមានបញ្ហាដល់ពួកគេ។

យោងតាមរបាយការណ៍ ក្មេងប្រុសអាយុ ១២ ឆ្នាំម្នាក់បានមកជួបគ្រូពេទ្យដោយមានរោគសញ្ញានៃការពិបាកដកដង្ហើម និង មានក្លិនមិនល្អចេញពីច្រមុះ ហើយមានជំងឺរលាកដដែលៗអស់រយៈពេលប្រាំពីរឆ្នាំមកហើយ។ ប៉ុន្តែមិនដឹងថាមកពីមូលហេតុអ្វីនោះទេ។ ក្នុង​ពេល​ពិនិត្យ​នោះ ​គ្រូពេទ្យ​បាន​រក​ឃើញ​ថា​ពិតជា​មាន​វត្ថុ​អ្វីមួយ​នៅ​ក្នុង​ច្រមុះរបស់ក្មេងប្រុសនោះ និងស្នើរឲ្យធ្វើការវះកាត់។

ក្នុងអំឡុងពេលវះកាត់ វេជ្ជបណ្ឌិតអាចយកវត្ថុនោះចេញបានដោយជោគជ័យ។ វត្ថុនោះ គឺជាបន្ទះត្រចៀកស៊ីលីកូនសម្រាប់កាសស្តាប់ត្រចៀក។ ក្មេង​ប្រុស​ម្នាក់​នេះអាច​នឹងលេង ហើយ​បញ្ចូលវាទៅក្នុង​ច្រមុះ​របស់​ខ្លួន​នៅ​អាយុ​៥ ​ឆ្នាំ។ បុគ្គលិកពេទ្យបាននិយាយថា បន្ទះត្រចៀកស៊ីលីកូននោះមានពណ៌ផ្កាឈូក ប៉ុន្តែវាត្រូវបានក្លែងស្ទើរតែមានពណ៌ដូចគ្នានឹងភ្នាសក្នុងច្រមុះរបស់ក្មេងប្រុសនោះទៅហើយ ។ ជាសំណាងល្អ ការវះកាត់បានជោគជ័យ ហើយ​ក្មេង​នោះ​បាន​ជា​សះស្បើយ​ហើយ​ទៅ​ផ្ទះ​វិញ​នៅ​ថ្ងៃ​បន្ទាប់៕