ប្រសិនបើកូនរបស់អ្នកបង្ហាញសញ្ញាទាំងនេះអោយអ្នកបានដឹង រឿងដែលអ្នកត្រូវធ្វើមុនគេគឺគួរតែព្យាយាមកែតម្រូវ ឬ ផ្តល់ដំបូន្មានដល់កូនអ្នកភ្លាមៗ ដើម្បីកុំឲ្យកូនរបស់អ្នកក្លាយជាក្មេងដែលគ្មានអនាគតល្អ មានភាពល្ងង់ខ្លៅ និងពិបាកបង្រៀននៅពេលអនាគត។

១.បានត្រឹមនិយាយតែគ្មានសកម្មភាព៖ ក្មេងៗជាច្រើននិយាយច្រើន ពួកគេនិយាយលេងសើច និយាយថានឹងធ្វើកិច្ចការផ្ទះ និងមើលថែឪពុកម្តាយឱ្យបានល្អ ផ្តល់ឱ្យឪពុកម្តាយរបស់ពួកគេនូវនេះឬរឿងនោះ ជាពិសេសនៅពេលដែលពួកគេត្រូវការអ្វីមួយ ពួកគេថែមទាំងនិយាយថានឹងធ្វើឱ្យបាន។ តែការនិយាយខុសពីទង្វើ ពួកគេចេះតែទាមទារការកម្សាន្ត ហើយខ្ជិល មិនចូលចិត្តធ្វើការងារផ្ទះ ហើយតែងតែបន្ទោសឪពុកម្តាយថា មិនអាចផ្តល់របស់ល្អជាងនេះដល់ពួកគេ។ ប្រសិនបើកុមារទាំងនេះមិនត្រូវបានប្រៀនប្រដៅទាន់ពេលវេលាទេ ពួកគេនឹងក្លាយជាក្មេងដែលគ្មានភាពច្បាស់លាស់ និងអាត្មានិយមខ្លាំងនៅពេលពួកគេធំឡើង។

២.ដឹងតែទទួល តែមិនចេះអរគុណ៖ ឪពុកម្តាយតែងតែផ្តល់អ្វីៗគ្រប់យ៉ាងដល់កូនដោយមិនចង់បានអ្វីត្រឡប់មកវិញ ប៉ុន្តែកូនខ្លះមិនមានចិត្តអំណរគុណចំពោះឪពុកម្តាយនោះទេ។ វាជារឿងធម្មជាតិសម្រាប់ឪពុកម្ដាយដែលស្រឡាញ់កូន ប៉ុន្តែមិនមានន័យថាពួកគេគួរទម្រើសកូននោះទេ។ ឪពុកម្តាយត្រូវបង្រៀនកូនឱ្យចេះឯករាជ្យ ជួយឪពុកម្តាយធ្វើកិច្ចការផ្ទះខ្លះតាមសមត្ថភាព លុះកូនរៀនចេះធ្វើការតាំងពីតូច ហើយចិញ្ចឹមចិត្តដឹងគុណ ទើបកូនធំឡើងក្លាយជាមនុស្សជោគជ័យ។

៣.ចូលចិត្តគេចពីការទទួលខុសត្រូវ៖ មានកុមារមួយចំនួនដែលពេលពួកគេធ្វើអ្វីខុសនឹងមិនទទួលខុសត្រូវតែព្យាយាមបន្ទោសអ្នកដទៃដោយមិនមានស្មារតីទទួលខុសត្រូវ។ នៅពេលដែលកូនប្រភេទនេះធំឡើង គាត់តែងតែបន្ទោសអ្នកដទៃចំពោះបញ្ហារបស់គាត់ ដូចជាឪពុកម្តាយ មិត្តភក្តិ និងមិត្តរួមការងារ។ ដូច្នេះហើយ ឪពុកម្តាយត្រូវបង្ហាត់កូនឱ្យចេះឯករាជ្យ និងទទួលខុសត្រូវចំពោះទង្វើរបស់ខ្លួន។

៤.តែងតែគំរាមកំហែងឪពុកម្តាយ៖ មានកុមារដែលនឹងគំរាមកំហែងឪពុកម្តាយរបស់ពួកគេនៅពេលដែលឪពុកម្តាយមិនអាចបំពេញបំណងអោយគេបាន។ ពួកគេឆ្លាត ហើយដឹងថាចំណុចខ្សោយរបស់ឪពុកម្តាយពួកគេនៅឯណា ដូច្នេះពួកគេតែងតែប្រើវាសម្រាប់គម្រាមឪពុកម្តាយ។ បើនៅតែបណ្តោយអោយកូនធ្វើបែបនេះ ថ្ងៃមុខទៅឪពុកម្តាយនឹងទឹកភ្នែកដោយសារតែកូនមិនខានឡើយ។

៥.ទម្លាប់ទាមទារនិងបង្ខំឪពុកម្តាយឱ្យផ្គត់ផ្គង់៖ កុមារជាច្រើនចូលចិត្តទាមទារ ពួកគេតែងតែសុំរឿងនេះ ឬ រឿងនោះតាមចិត្តចង់បាន។ ដោយសារឪពុកម្តាយស្រលាញ់កូនខ្លាំង តែងតែបំពេញតាមការស្នើសុំរបស់ពួកគេ ដែលវានឹងក្លាយទៅជាទម្លាប់អាក្រក់ខ្លាំងណាស់។ ឪពុកម្តាយត្រូវដឹងថា ដើម្បីស្រលាញ់កូន កុំគិតតែអាចបំពេញចិត្តពួកគេ តែត្រូវប្រាកដថាកូនរបស់អ្នកមានឥរិយាបថល្អ ចេះស្កប់ស្កល់ និងមានសុជីវធម៌ខ្ពស់៕