សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. ក្រសួងកសិកម្ម គ្រោងវិនិយោគលើប្រព័ន្ធសូឡាបូមទឹកដល់សហគមន៍កសិកម្មទំនើប«ម្រេចមេមត់ត្បូងឃ្មុំ»

ក្រសួងកសិកម្មគ្រោងនឹងវិនិយោគលើប្រព័ន្ធសូឡាបូមទឹកជូនដល់សមាជិកទាំង ៦៥គ្រួសារ នៃសហគមន៍កសិកម្មទំនើប «ម្រេចមេមត់ត្បូងឃ្មុំ» ជំនួសឱ្យការប្រើប្រាស់ម៉ាស៊ីនបូមទឹកដើរដោយប្រេងម៉ាស៊ូត ដើម្បីកាត់បន្ថយចំណាយប្រតិបត្តិការប្រចាំថ្ងៃរបស់សហគមន៍។

២. សម្ដេចធិបតី បញ្ជាក់ថា ភាសាខ្មែរនឹងនៅតែជាភាសាជាតិតែមួយគត់ នៅក្នុងកម្មវិធីអប់រំរបស់ជាតិ

សម្ដេចធិបតី ភាសាខ្មែរនឹងនៅតែជាភាសាជាតិតែមួយគត់ នៅក្នុងកម្មវិធីអប់រំរបស់ជាតិ រីឯភាសាបារាំង អង់គ្លេស ជប៉ុន កូរ៉េ ផ្សេងៗទៀត ជាភាសាសម្រាប់រៀនបន្ទាប់បន្សំប៉ុណ្ណោះ។​ នេះបើតាមការលើកឡើងរបស់ សម្តេចមហាបវរធិបតី ហ៊ុន ម៉ាណែត​​ នាយករដ្ឋមន្ត្រី នៃព្រះរាជាណាចក្រកម្ពុជា​​ អញ្ជើញជាអធិបតី “​សំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត ៣”។

៣. រដ្ឋមន្រ្តីក្រសួងព័ត៌មាន ផ្តាំផ្ញើសិស្សនិទ្ទេសA ត្រូវពង្រឹងសមត្ថភាព ព្រោះក្នុងសង្គមគេផ្តល់តម្លៃអ្នកចេះដឹង

នៅក្នុងសង្គមនេះបានផ្តល់តម្លៃដល់អ្នកចេះដឹង ដូច្នេះត្រូវប្រឹងប្រែងសិក្សារៀនសូត្រ កសាងនូវសមត្ថភាពអោយបារឹងមាំ ហើយប្រកាន់យកអោយបាននូវចំណេះដឹង ខិតខំប្រឹងប្រែងក្នុងការបំពេញការងារ ព្យាយាមអំណត់ និងភាពស្មោះត្រង់។ នេះជាការថ្លែងរបស់ ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន ក្នុងពិធីជួបសំណេះសំណាលជាមួយ លោកគ្រូ អ្នកគ្រូ មាតាបិតា និងបេក្ខជន បេក្ខនារី ដែលបានប្រឡងជាប់សញ្ញាបត្រមធ្យមសិក្សាទុតិយភូមិ «និទ្ទេស A» ចំនួន ៥៦នាក់ នៅទូទាំងខេត្តក្រចេះ។

៤. អស្ចារ្យណាស់! កម្ពុជាអាចដណ្ដើមបានមេដាយ ៣០គ្រឿងពីការប្រកួតកីឡាវ៉ូវីណាមជើងឯកអាស៊ី នៅឥណ្ឌូណេស៊ី

ក្រុមកីឡាករវ៉ូវីណាមជម្រើសជាតិកម្ពុជាបានបញ្ចប់បេសកកម្មដោយជោគជ័យក្នុងការប្រកួតជើងឯកអាស៊ី លើកទី៥ ឆ្នាំ២០២៤ នៅកោះបាលី ប្រទេសឥណ្ឌូណេស៊ី ដែលអាចដណ្ដើមបានមេដាយសរុបចំនួន ៣០គ្រឿង និងទទួលបានចំណាត់ថ្នាក់លេខ២ ក្នុងចំណោម ១៥ប្រទេសដែលបានចូលរួមប្រកួត។ 

៥. ប្រព័ន្ធគាំពារសង្គមគ្រោងបញ្ចេញថវិកាជិត ៣០លានដុល្លារ ដើម្បីផ្តល់ប្រាក់ឧបត្ថម្ភដល់សិស្សក្រីក្រប្រមាណ ៤៥ម៉ឺននាក់

ប្រព័ន្ធគាំពារសង្គម គ្រោងបញ្ចេញថវិកាជិត ៣០លានដុល្លារទៀត ដើម្បីផ្តល់ប្រាក់ឧបត្ថម្ភប្រចាំខែដល់សិស្សក្រីក្រប្រមាណ ៤៥ ម៉ឺននាក់នៅទូទាំងប្រទេស។

៦. អ្នកនាំពាក្យនៃក្រសួងសាធារណការ បញ្ជាក់ពីករណីគ្រោះថ្នាក់រវាងរថភ្លើងនិងរថយន្តក្រុងនៅខេត្តពោធិ៍សាត់ ជាហេតុការណ៍ចាស់

កាលពីយប់ថ្ងៃទី២២ រហូតដល់ព្រឹកថ្ងៃទី២៣ ខែធ្នូ ឆ្នាំ២០២៤នេះ មហាជននិយមលេងបណ្តាញទំនាក់ទំនងសង្គមកំពុងផ្ទុះការចែករំលែក និងផ្សព្វផ្សាយបន្តគ្នា អំពីករណីគ្រោះថ្នាក់ចរាចររណ៍រវាងរថភ្លើងជាមួយនឹងរថយន្តក្រុងទេសចរណ៍នៅក្នុងភូមិសាស្ត្រនៃខេត្តពោធិ៍សាត់។ 

៧. សម្ដេចធិបតីលើកទឹកចិត្តឲ្យរៀបចំកម្មវិធីតាំងពិព័រណ៍សៀវភៅឲ្យបានច្រើនដើម្បីជំរុញការអានសៀវភៅ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា លើកទឹកចិត្តឲ្យមានការរៀបចំពិព័រណ៍សៀវភៅឲ្យកាន់តែច្រើនឡើង ខណៈសម្តេចធិបតីសង្កេតឃើញកំណើននៃការចូលរួម និងអ្នកស្រលាញ់ការអានសៀវភៅមានកាន់ច្រើនឡើង។ 

៨. អាជ្ញាធរ​បាន​ព្រមាន​ពី​រដូវ​ភ្លើង​ឆេះ​ព្រៃ​ដែល​មាន​ហានីភ័យ​ខ្ពស់​ក្នុង​រដូវក្តៅនៅ​អូស្ត្រាលី

ក្រុមមន្ត្រីបាននិយាយកាលពីថ្ងៃអាទិត្យម្សិលមិញនេះថា ភ្លើងឆេះព្រៃដែលមិនអាចគ្រប់គ្រងបាននៅក្នុងរដ្ឋ Victoria របស់ប្រទេសអូស្ត្រាលី ដែលបានជំរុញឲ្យមានការជម្លៀសអ្នកស្រុករាប់រយនាក់នឹងឆេះអស់រយៈពេលជាច្រើនថ្ងៃ។

៩. ភ្នាក់ងារ​សុខាភិបាល​ខេត្ត Tak ប្រទេសថៃប្រកាស​អាសន្ន​ជំងឺ​អាសន្នរោគ បន្ទាប់​ពី​មាន​អ្នក​ស្លាប់​២​នាក់​ក្នុង​ប្រទេស​មីយ៉ាន់ម៉ា

ក្រសួង​សុខាភិបាល​សាធារណៈថៃ​បាន​បើក​មជ្ឈមណ្ឌល​ប្រតិបត្តិការ​សង្គ្រោះ​បន្ទាន់ (EOC) ក្នុង​ខេត្ត Tak ក្នុង​គោលបំណង​ទប់ស្កាត់​ជំងឺ​អាសន្នរោគ​ដែល​កំពុង​រាតត្បាត​នៅ​ទីក្រុង Shwe Kokko ​ប្រទេស​មីយ៉ាន់ម៉ាដែលមានព្រំប្រទល់ជាប់និងប្រទេសថៃ។

១០. កងទ័ពបារាំង បន្តចែកស្បៀង និងទឹកដល់ជនរងគ្រោះដោយព្យុះស៊ីក្លូននៅកោះMayotte

កងទ័ពបារាំង បុគ្គលិកមន្ត្រីរាជការ បានចុះដល់ទីតាំងកំពុងរងគ្រោះ និងបានដឹកជញ្ជូនគ្រឿងផ្គត់ផ្គង់ សម្ភារៈជួយសង្គ្រោះ និងរបស់របរប្រើប្រាស់មួយចំនួនដល់ប្រជាជន ក្រោយពីព្យុះស៊ីក្លូនChido ដែលជាព្យុះស៊ីក្លូនត្រូពិចដ៏មានឥទ្ធិពល បានវាយប្រហារកោះ Mayotte (ម៉ាយ៉ាត) ខណៈព្យុះកំណាចនេះក៏បានបន្តវាយប្រហារទៅលើប្រទេសMozambique បង្កឲ្យមានអ្នកស្លាប់កើនឡើងដល់ ៩៤នាក់ហើយ៕