សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា លើកទឹកចិត្តឲ្យមានការរៀបចំពិព័រណ៍សៀវភៅឲ្យកាន់តែច្រើនឡើង ខណៈសម្តេចធិបតីសង្កេតឃើញកំណើននៃការចូលរួម និងអ្នកស្រលាញ់ការអានសៀវភៅមានកាន់ច្រើនឡើង។ 

សម្តេចធិបតី ហ៊ុន ម៉ាណែត លើកឡើងដូចនេះ ក្នុងជួបសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និង ការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ ឆ្នាំ២០២៤ ចំនួន ២ ២២៥ នាក់ នាថ្ងៃទី២៣ ខែធ្នូ ឆ្នាំ២០២៤។ សម្តេចធិបតី ហ៊ុន ម៉ាណែត ថ្លែងថា៖«ខ្ញុំសប្បាយចិត្តឥលូវឃើញទិវា កន្លែងគេរៀបលក់សៀវភៅ បើកពិព័រណ៍ម្តងៗមនុស្សទៅ ឪពុកម្តាយនាំកូនទៅទិញសៀវភៅមើល ខ្ញុំសូមលើកទឹកចិត្តឲ្យរៀបឲ្យកាន់តែច្រើន»។  

ជាមួយគ្នានេះ សម្តេចធិបតីក៏ជំរុញឲ្យក្មេង យុវ័យនាំគ្នារៀនអានសៀវភៅ និងសំណូមពរដល់ឪពុកម្តាយ អាណាព្យាបាល ឲ្យជួយជំរុញឲ្យកូនៗអានសៀវភៅ ជាជាងការប្រើប្រាស់ ឬមើលទូរស័ព្ទដៃក្នុងវ័យនៅក្មេងខ្ចី ខណៈការរៀនសូត្រ ជាពិសេសការអានសៀវភៅអាចជួយឲ្យបង្កើនចំណេះដឹង និងការស្រាវជ្រាវបានមួយកម្រិតទៀតផងដែរ។ 

សម្ដេចធិបតីបានបញ្ជាក់ទៀតថា ចំពោះកូនៗនៅវ័យក្មេង ឪពុកម្តាយ ឬអាណាព្យាបាល អាចជំរុញការអានសៀវភៅ ដោយមិនចាំបាច់តែសៀវភៅដែលកម្រិតខ្ពស់នោះទេ ត្រឹមតែសៀវភៅរឿងព្រេងនិទានឬសៀវភៅគំនូរជីវចល ក៏អាចជំរុញឲ្យអានផងដែរ៕