មន្ទីរពេទ្យបង្អែកប៉ោយប៉ែត បានបដិសេធ និងច្រានចោលទាំងស្រុងចំពោះការចុះផ្សាយព័ត៌មាន ដែលមានខ្លឹមសារថា «ការប្រើពេទ្យគ្មានជំនាញធ្វើឱ្យម្ដាយ និងទារកស្លាប់ជាង១០នាក់នៅមន្ទីរពេទ្យបង្អែកប៉ោយប៉ែត»។

ដោយក្នុងលិខិតបដិសេធមានអត្ថន័យថា «ការចុះផ្សាយនេះ គឺជាព័ត៌មានមិនពិត មួលបង្កាច់ ធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស និងសេចក្ដីថ្លៃថ្នូរបស់គ្រូពេទ្យក៏ដូចការខិតខំប្រឹងប្រែងរបស់មន្ទីរសុខាភិបាលនៃរដ្ឋបាលខេត្តបន្ទាយមានជ័យ ក្នុងការកែលម្អ និងលើកកម្ពស់គុណភាពនៃការបម្រើសេវាសាធារណៈជូនប្រជាជន ដោយបុរេសកម្ម អនុវត្តតាមគោលការណ៍បច្ចេកទេសត្រឹមត្រូវនៃក្រសួងសុខាភិបាល ដោយមានការទទួលខុសត្រូវខ្ពស់ក្នុង វិជ្ជាជីវៈ និងក្រមសីលធម៌របស់គ្រូពេទ្យ។

បើគិតពីថ្ងៃទី០១ ខែមករា ឆ្នាំ២០២៤ ដល់ថ្ងៃទី ៣០ ខែវិច្ឆិកា ឆ្នាំ២០២៤នេះ មានស្ត្រីមានផ្ទៃពោះមកទទួលយក សេវាសម្រាលកូននៅមន្ទីរពេទ្យបង្អែកប៉ោយប៉ែតមានចំនួនសរុប ១៥២១នាក់ ក្នុងនោះសុខភាពម្តាយ និងទារកទទួលបានលទ្ធផល យ៉ាងល្អប្រសើរ។ ប៉ុន្តែទន្ទឹមនឹងនោះ ក្រុមគ្រូពេទ្យបានជួបប្រទះករណីស្ត្រីមានផ្ទៃពោះ ពេលមកទទួលសេវាសម្រាលកូន ទារកក្នុងផ្ទៃមានសុខភាពខ្សោយ និងករណីខ្លះក៏បានស្លាប់មុនកំណើត ដែលក្រុមគ្រូពេទ្យនៅតែបានធ្វើការជួយសង្គ្រោះយក សពទារកតាមលក្ខណៈបច្ចេកទេស ដើម្បីជៀសវាងផលប៉ះពាល់ដល់សុខភាព ឬគ្រោះថ្នាក់ដល់អាយុជីវិតម្ដាយ។

ចំពោះក្រុមគ្រូពេទ្យជាវេជ្ជបណ្ឌិត ឆ្មបផ្នែកសម្ភពទាំងអស់នៃមន្ទីរពេទ្យបង្អែកប៉ោយប៉ែត សុទ្ធតែមានសញ្ញាបត្របច្ចេកទេស និងទទួលបាននូវការបណ្តុះបណ្តាលត្រឹមត្រូវពីមជ្ឈមណ្ឌលជាតិគាំពារមាតា និងទារក ជាពិសេសការបណ្តុះ បណ្តាលអភិវឌ្ឍវេជ្ជសាស្ត្របន្ត និងពីសមាគមសម្ភព និងរោគស្ត្រី ព្រមទាំងការត្រួតពិនិត្យការងារបច្ចេកទេសពីគណៈគ្រូពេទ្យ គណៈឆ្មប និងឆ្លងកាត់ការចុះបង្វឹកពីក្រុមការងារលើកកម្ពស់ និងកែលម្អគុណភាពសេវាជាប្រចាំ។

ម្យ៉ាងទៀតមន្ទីរពេទ្យ បង្អែកប៉ោយប៉ែត មានអតិថិជនជាអ្នកជំងឺមកទទួលយកសេវាពិនិត្យ និងព្យាបាលជំងឺយ៉ាងច្រើនកុះករ ហើយចំពោះសេវា សម្រាលកូនមានតួលេខជាមធ្យម ១២០ នាក់ ក្នុងមួយខែ ដែលជាតួលេខខ្ពស់ជាងគេក្នុងមន្ទីរពេទ្យទាំងអស់នៅក្នុងខេត្តបន្ទាយមានជ័យ ដែលនេះបង្ហាញឱ្យឃើញនូវការជឿទុកចិត្ត និងពេញចិត្តរបស់អតិថិជនចំពោះការបម្រើសេវារបស់មន្ទីរពេទ្យ មិនដូចអ្វីដែលគណនីឈ្មោះ VOD Khmer ចុះផ្សាយនោះឡើយ»។

មន្ទីរពេទ្យបង្អែកប៉ោយប៉ែតជាថ្មីម្តងទៀត ក៏បានបដិសេធ និងច្រានចោលទាំងស្រុងចំពោះការចុះផ្សព្វផ្សាយ ព័ត៌មានមិនពិត និងស្នើឱ្យម្ចាស់គណនីឈ្មោះ VOD Khmer ធ្វើការលុប និងកែតម្រូវចំពោះព័ត៌មានដែលបាន ផ្សព្វផ្សាយ ដោយគ្មានមូលដ្ឋានត្រឹមត្រូវ និងច្បាស់លាស់ជាបន្ទាន់ផងដែរ៕