សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. ព្រះរាជក្រឹត្យ បង្កើតគណៈកម្មាធិការជាតិដឹកនាំអនុវត្ត កម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព

ព្រះមហាក្សត្រ ចេញព្រះរាជក្រឹត្យបង្កើតគណៈកម្មាធិការជាតិដឹកនាំអនុវត្តកម្មវិធីផ្ដល់ដី ការពារព្រៃដើម្បីរួមគ្នាអភិវឌ្ឍដោយចីរភាព ដែលសរសេរជាអក្សរកាត់ថា ផ.ក.អ.។ 

២.​ សម្តេចតេជោ ហ៊ុន សែន វាយតម្លៃខ្ពស់ចំពោះភាពរីកចម្រើនជាលំដាប់រវាងកម្ពុជា-ជប៉ុន នៅលើវិស័យនានា

សម្តេចតេជោ ហ៊ុន សែន វាយតម្លៃខ្ពស់ចំពោះភាពរីកចម្រើនជាលំដាប់រវាងកម្ពុជា-ជប៉ុន នៅលើវិស័យនានា និងសម្តែងនូវក្តីអំណរគុណចំពោះជប៉ុន ក្នុងការគាំទ្រ រួមចំណែកអភិវឌ្ឍកម្ពុជា តាំងពីពេលកម្ពុជាទទួលបានឯករាជ្យ និងពេលបច្ចុប្បន្ន។

៣. ក្រសួងសុខាភិបាល ចេញវិធានការការពារសុខភាពពីជំងឺបង្កដោយវីរុសណូរ៉ូ «Norovirus»

ក្រសួងសុខាភិបាល ចេញវិធានការការពារសុខភាពពីជំងឺបង្កដោយវីរុសណូរ៉ូ «Norovirus» ដោយរោគសញ្ញាភាគច្រើន មាន រាក ក្អួត ចង្អោរ ចុកពោះ និងអាចមាន ក្តៅខ្លួន ឈឺក្បាល និងឈឺខ្លួន។

៤. ប្រធានាធិបតីកូរ៉េខាងត្បូងលោក Yoon Suk Yeol​ ត្រូវក្រុមស៊ើបអង្កេតចេញដីកាកោះហៅជាលើកទី២

ប្រធានាធិបតីកូរ៉េខាងត្បូងលោក Yoon Suk Yeol​ ត្រូវក្រុមស៊ើបអង្កេតចេញដីកាកោះហៅជាលើកទី២ បន្ទាប់ពីលោកបានបដិសេធការកោះហៅពីមុនក្នុងសប្តាហ៍នេះ។

៥.សប្បាយក្លាយជាទុក្ខ! នៅប្រទេសនីហ្សេរីយ៉ាមានសិស្សានុសិស្សស្លាប់និងរបួសជាច្រើននាក់ ដោយសាររត់ជាន់គ្នា

ប្រទេសនីហ្សេរីយ៉ាមានសិស្សានុសិស្សស្លាប់និងរបួសជាច្រើននាក់ ដោយសាររត់ជាន់គ្នាក្នុងការប្រារព្ធពិធីបុណ្យណូអែល នៅវិទ្យាល័យអ៊ីស្លាមមួយ ដែលស្ថិតនៅភាគនិរតីនៃទីក្រុង Ibadan។

៦. រដ្ឋាភិបាល​ថៃសម្តែង​ការ​រំលែក​ទុក្ខ ដល់ជន​ជាតិ​ថៃដែលបាន​ស្លាប់​ក្នុង​គ្រោះ​រញ្ជួយ​ដី​នៅ​ប្រទេស​វ៉ានូអាទូ

រដ្ឋាភិបាល​ថៃសម្តែង​ការ​រំលែក​ទុក្ខ ដល់គ្រួសារអ្នកដែលបាន​ស្លាប់​ក្នុង​គ្រោះ​រញ្ជួយ​ដី​នៅ​ប្រទេស​វ៉ានូអាទូ ដោយក្នុងនោះមានជនជាតិថៃម្នាក់បានស្លាប់ និង ៣នាក់ផ្សេងទៀតបានរងរបួស។

៧. មិនទាន់ចប់ទេ! Thida Kol ចេញសុំទោស លោក វណ្ណថាន រឿងចោទថាចម្លងជំងឺ ឯរឿងផ្សេងៗទៀតជាការពិត

ក្រោយពី លោក​ វណ្ណថាន បានចេញលិខិតបំភ្លឺជាសាធារណៈឆ្លើយតបទៅកាន់រឿងរ៉ាវដែលនារីម្នាក់មានគណនី Thida Kol បានចោទថាលោកចម្លងជំងឺដល់នាង តារាចម្រៀងប្រុសរូបនេះកំពុងសម្ងំប្រមូលភ័ស្តុតាងដើម្បីចាត់វិធានការតាមផ្លូវច្បាប់បញ្ជាក់ពីភាពស្អាតស្អំ។

៨. គម្រោងជួសជុលព្រះលានជល់ដំរីក្នុងបរិវេណអង្គរធំ នឹងត្រូវបញ្ចប់នៅដើមឆ្នាំ២០២៥

នៅក្នុងបរិវេណអង្គរធំ គម្រោងជួសជុលព្រះលានជល់ដំរី ចំនួន២ទីតាំង នៅផ្នែកខាងជើង និងផ្នែកខាងត្បូង ក្រោមកិច្ចសហប្រតិបត្តិការរវាងអាជ្ញាធរជាតិអប្សរា និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) តាមរយៈទីភ្នាក់ងារបេតិកភណ្ឌកូរ៉េ (KHA) គ្រោងនឹងបញ្ចប់នៅចុងខែមករា ឆ្នាំ២០២៥ ខាងមុខ។

៩. ទីបំផុតមន្ទីរសុខាភិបាលខេត្តសៀមរាប បានចុះទៅពិនិត្យ និងបិទទីតាំងលោកគ្រូព្យាបាលម្ជុលវិទ្យាសាស្រ្តលើទារកហើយ

ដោយមានការចែករំលែកច្រើនពេញបណ្ដាញសង្គមជុំវិញបញ្ហាអាណាព្យាបាលយកទារកទៅព្យាបាលដោយប្រើម្ជុលចាក់សុះពេញដៃ ធ្វើឲ្យគ្រប់គ្នាឃើញហើយបានសម្ដែងការហួសចិត្ត និងកើតក្ដីអាណិតយ៉ាងខ្លាំងទៅដល់ទារកតូចរូបនោះ ព្រមទាំងមានមហាជនជាច្រើនបានខឹងសម្បារបន្ទោសយ៉ាងចាស់ដៃទៅកាន់ឪពុកម្ដាយថាកូនតូចឈឺហេតុអ្វីមិនយកទៅពេទ្យដែលមានជំនាញច្បាស់លាស់ បែជាយកទៅគ្រូនោះប្រើម្ជុលចាក់ពេញដៃទៅវិញ បន្ថែមពីនេះក៏មានអ្នកខ្លះទៀតបានស្នើរដល់ក្រសួងសុខាភិបាលជួយមានវិធានការណ៍ចុះទៅត្រួតពិនិត្យផង។

១០. មិនធ្លាប់ដឹងសោះ! លោក នេនទុំ ទម្លាយអស់គ្មានសល់ថាខ្លួនធ្លាប់ប្រើប្រាស់ថ្នាំ ប្រឹងផ្ដាច់វិញទាំងលំបាក

លោក នេនទុំ ដែលគ្រប់បានស្គាល់គាត់យ៉ាងច្បាស់ថាជាតារារ៉េបមួយរូបដែលមានឈ្មោះបោះសំឡេង បានធ្វើឲ្យមហាជនភ្ញាក់ផ្អើលដោយលោកបានធ្វើបទសម្ភាសក្នុងកម្មវិធី «VTalk Confession» បង្ហើបពីរឿងរ៉ាវដ៏ខ្មៅងងឹតដែលខ្លួនមិនធ្លាប់បានបង្ហើបប្រាប់មហាជនឲ្យដឹងសោះថាកន្លងមកខ្លួនធ្លាប់មានអតីតមិនល្អប្រើប្រាស់ថ្នាំ និងប្រាប់ពីរឿងជូរចត់ពេលព្យាយាមផ្ដាច់វិញ៕