ប្រធានគណបក្សគ្រប់គ្រងប្រទេសកូរ៉េខាងត្បូងបានបង្ហាញការគាំទ្រ សម្រាប់ការព្យួរអំណាចរដ្ឋធម្មនុញ្ញរបស់ប្រធានាធិបតី Yoon Suk Yeol ដែលបានដាក់ច្បាប់អាជ្ញាសឹកនៅសប្តាហ៍នេះធ្វើឲ្យការចោទប្រកាន់របស់លោក Yoon ទំនងជាកាន់តែខ្លាំង។មេដឹកនាំគណបក្សអំណាចប្រជាជន លោក Han Dong-hun បានប្រាប់ប្រព័ន្ធផ្សព្វផ្សាយក្នុងស្រុកក្នុងទីក្រុងសេអ៊ូលថា លោកបានទទួលព័ត៌មានថា លោក Yoon Suk Yeol បានបញ្ជាឲ្យមេបញ្ជាការប្រឆាំងចារកម្មការពារជាតិរបស់កូរ៉េខាងត្បូងចាប់ខ្លួន និងឃុំខ្លួនអ្នកនយោបាយសំខាន់ៗដែលមិនបានបញ្ជាក់ ដោយផ្អែកលើការចោទប្រកាន់នៃ «សកម្មភាពប្រឆាំងរដ្ឋ» ក្នុងអំឡុងពេលច្បាប់អាជ្ញាសឹក។ លោក Han Dong-hun កាលពីថ្ងៃព្រហស្បតិ៍បាននិយាយថា លោកនឹងធ្វើការដើម្បីកម្ចាត់ចលនាចោទប្រកាន់នេះ បើទោះបីជាលោកបានរិះគន់ការប្រកាសច្បាប់អាជ្ញាសឹករបស់លោក Yoon ថា «មិនស្របតាមរដ្ឋធម្មនុញ្ញ» ក៏ដោយ។ លោក Han បាននិយាយថា មានតម្រូវការដើម្បីទប់ស្កាត់ការខូចខាតដល់ប្រជាពលរដ្ឋ និងអ្នកគាំទ្រដែលបណ្តាលមកពីភាពចលាចលដែលមិនបានរៀបចំទុកជាមុន។គណបក្សប្រឆាំងកំពុងជំរុញឲ្យមានការបោះឆ្នោតសភាលើការចោទប្រកាន់របស់លោក Yoon នៅថ្ងៃសៅរ៍ ដោយហៅការប្រកាសច្បាប់អាជ្ញាសឹករយៈពេលខ្លីរបស់គាត់ថា «មិនស្របតាមរដ្ឋធម្មនុញ្ញ ការបះបោរខុសច្បាប់ ឬរដ្ឋប្រហារ»។ ប៉ុន្តែពួកគេត្រូវការការគាំទ្រពីសមាជិកបក្សកាន់អំណាចមួយចំនួនដើម្បីទទួលបានសំឡេងភាគច្រើនពីរភាគបី ដើម្បីអនុម័តចលនាចោទប្រកាន់។លោក Han Dong-hun បាននិយាយកាលពីថ្ងៃសុក្រថា លោក Yoon Suk Yeol បង្កហានិភ័យដ៏សំខាន់នៃសកម្មភាពជ្រុលនិយម ដូចជាការប៉ុនប៉ងឡើងវិញក្នុងការដាក់ច្បាប់អាជ្ញាសឹក ដែលអាចធ្វើឲ្យសាធារណរដ្ឋកូរ៉េ និងប្រជាជនរបស់ខ្លួនស្ថិតក្នុងគ្រោះថ្នាក់យ៉ាងខ្លាំង។

នៅថ្ងៃដដែលនោះ លោក Lee Jae-myung មេដឹកនាំគណបក្សប្រឆាំងដ៏ធំបានចេញសេចក្តីថ្លែងការណ៍មួយ ដោយអំពាវនាវឲ្យមានការព្យួរតំណែងជាបន្ទាន់នូវប្រធានាធិបតី Yoon Suk Yeol ។ ការចោទប្រកាន់ Yoon ត្រូវការការគាំទ្រពីពីរភាគបីនៃរដ្ឋសភា ឬ ២០០ នៃសមាជិក ៣០០ របស់ខ្លួន។ គណបក្សប្រឆាំងដែលបានរួមគ្នាធ្វើចលនាចោទប្រកាន់នេះមានអាសនៈសរុបចំនួន ១៩២៕

សម្របសម្រួលអត្ថបទដោយ៖ ផល្លីកា