មហាសេដ្ឋីបច្ចេកវិទ្យាលោក Elon Musk បានធ្វើឲ្យពិភពលោកភ្ញាក់ផ្អើល ជាពិសេសប្រជាជនក្នុងសហរដ្ឋអាមេរិក ក្រោយលោកបង្ហាញពីមហិច្ឆតាចង់បង្កើតយន្តហោះប្រភេទ Super Sonic Space Jet ជាមួយបច្ចេកវិទ្យាដ៏ទំនើប អាចហោះហើរក្នុងល្បឿនលឿន និងក្នុងរយៈកម្ពស់ខ្ពស់ដែលមិនធ្លាប់មានពីមុនមក។ 

បើតាមការឲ្យដឹងពីទីភ្នាក់ងារសារព័ត៌មានបរទេសមួយ ចុះផ្សាយនាពេលថ្មីៗនេះបានឲ្យដឹងថា មុននឹងមានមហិច្ឆតាដើម្បីសម្រេចក្តីស្រមៃក្នុងការបង្កើតយន្តហោះប្រភេទ Super Sonic Space Jet នាថ្ងៃអនាគតនេះ លោក Elon Musk បានគិតគូរ និងស្រាវជ្រាវជាច្រើនឆ្នាំមកហើយ ដោយគ្រោងនឹងបំពាក់ជាមួយបច្ចេកវិទ្យាទំនើបៗ ដែលអាចធ្វើដំណើរក្នុងល្បឿនលឿនជាងសម្លេង គឺល្បឿន supersonic ហើយតួយន្តហោះទាំងមូលក៏មានការរចនាដ៏ល្អឥតខ្ចោះថែមទៀតផង។ 

គោលបំណង នៃការបង្កើតយន្តហោះប្រភេទ Super Sonic Space Jet នេះឡើងគឺមិនត្រឹមផ្តល់ជូនបទពិសោធន៌ថ្មីសម្រាប់អ្នកធ្វើដំណើរដែលមិនធ្លាប់មានពីមុនមកទេ ថែមទាំងគិតដល់បដិវត្តន៍ឧស្សាហកម្មអាកាសចរណ៍នៅក្នុងប្រទេស និងគិតគូដល់បរិស្ថានដែលនឹងកាត់បន្ថយការបំភាយឧស្ម័នទៅលើបរិយាកាសថែមទៀតផង៕