សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. គួរឲ្យសរសើរ! យុវជនម្នាក់ពុះពាររៀនសូត្រទាំងជីវភាពខ្វះខាត រហូតទទួលបាននិទ្ទេស A 

អ្នកលេងបណ្ដាញសង្គមហាក់ងាកមកចាប់អារម្មណ៍ និងស្ញប់ស្ញែងទៅកាន់យុវជនម្នាក់មានជីវភាពខ្វះខាតខ្លាំង តែប្អូនប្រុសរូបនេះនៅតែខិតខំព្យាយាមសិក្សាដោយមិនបោះបង់ចោល បើទោះបីជាមានការលំបាកយ៉ាងណាក្ដីក៏ប្អូននៅតែពុះពាររហូតទទួលបានជោគជ័យនៅជំហ៊ានដំបូង គឺប្អូនប្រុសទទួលបាននិទ្ទេស A ក្នុងលទ្ធផលប្រឡងថ្នាក់មធ្យមសិក្សាទុតិយភូមិ ឆ្នាំសិក្សា២០២៤។ 

នេះបើយោងតាមការបង្ហោះក្នុងគណនីមួយមានឈ្មោះ Sreychum Oeurng បានបង្ហោះនូវរូបប្អូនប្រុសកម្សត់នោះអមជាមួយសំណេរបែបនេះថា៖ «ទោះបីគ្រួសារក្រីក្រឪពុកមានជម្ងឺប្រចាំកាយ ម្តាយជាកម្មករ ជីវភាពខ្វះខាត តែប្អូនមិនចុះចាញ់ឡើយ ខិតខំរៀនរហូត។យុវសិស្ស គ្រុឌ សុវណ្ណារ៉ា សិស្សថ្នាក់ទី12A វិទ្យាល័យហ្វារពន្លឺសិល្បៈ ទទួលបាននិទ្ទេសA ។ជូនពរប្អូនទទួលបានជោគជ័យក្នុងឆាកជីវិត កុំបោះបង់ការតស៊ូ»។

២. លោក អ៊ុំ ប៊ុនរ៉េត ធ្វើដំណើរដោយម៉ូតូធំតែម្នាក់ឯងពីប្រទេសក្នុងតំបន់អ៊ីរ៉ុបមកកាន់កម្ពុជា ដើម្បីកុមារកម្ពុជា

លោក អ៊ុំ ប៊ុនរ៉េត កំពុងធ្វើដំណើរដោយម៉ូតូធំតែម្នាក់ឯងពីប្រទេសក្នុងតំបន់អ៊ីរ៉ុបមកកាន់ប្រទេសកម្ពុជា។ បច្ចុប្បន្នលោកបានធ្វើដំណើរមកដល់ទីក្រុងឃុនមីង ខេត្តយូណាន ប្រទេសចិនហើយ ដោយលោកបានធ្វើដំណើរប្រមាណ ២៦០០០គីឡូម៉ែត្រ ដែលបានឆ្លងកាត់ប្រទេសជាង២១។ 

៣. គម្រោងកសាងហេដ្ឋារចនាសម្ព័ន្ធតាមព្រំដែន និងផ្លូវក្រវាត់ព្រំដែន បានចាប់ផ្តើមដំណើរការហើយ 

ការដ្ឋានគម្រោងកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន បានចាប់ផ្តើមចល័តគ្រឿងចក្រទៅចូលគោលដៅ ដើម្បីដំណើរការដ្ឋានសាងសង់ជាផ្លូវការហើយ នៅព្រឹកថ្ងៃទី១ ខែវិច្ឆិកា ឆ្នាំ២០២៤ នេះ។ 

៤. ពិធីករ សុខ រ៉ាស៊ី ដាស់តឿនដល់មហាជន គួរប្រុងប្រយ័ត្នចំពោះទំនិញតាមអនឡាញគ្មានប្រភពច្បាស់លាស់អាចបណ្ដាលឲ្យប៉ះពាល់សុខភាព 

លោក សុខ រ៉ាស៊ី ពិធីករមួយរូបដ៏មានប្រជាប្រិយភាពប្រចាំប៉ុស្ដិ៍ទូរទស្សន៍ហង្សមាស បានបង្ហោះជាសំណេរមួយក្នុងបណ្ដាញសង្គមក្នុងន័យដាស់តឿនដល់ប្រជាពលរដ្ឋខ្មែរយើង ពិសេសអ្នកនិយមចូលចិត្តទិញនូវផលិតផលអាហារបំប៉នតាមអនឡាញដែលឃោសនាហួសពីការពិតគ្មានប្រភពច្បាស់លាស់ គួរតែប្រយ័ត្នឲ្យបានខ្ពស់ ព្រោះផលិតផលប្រភេទទាំងនេះអាចនាំឲ្យប៉ះពាល់សុខភាពធ្ងន់ធ្ងរនាពេលអនាគត។

៥. ព្យុះទីហ្វុង Kong Rey បានបំផ្លិចបំផ្លាញពាសពេញកោះតៃវ៉ាន់ ជាមួយនឹងខ្យល់បក់ និងភ្លៀងធ្លាក់ខ្លាំងបង្កជាទឹកជំនន់ 

ព្យុះទីហ្វុង Kong Rey បានបង្កការបំផ្លិចបំផ្លាញពាសពេញកោះតៃវ៉ាន់ ចាប់តាំងពីដើមថ្ងៃព្រហស្បតិ៍ ជាមួយនឹងខ្យល់បក់ខ្លាំង និងភ្លៀងធ្លាក់ខ្លាំង បណ្តាលឲ្យមានការរអិលបាក់ដី ខ្យល់បក់បោករលំភ្លើងបំភ្លឺផ្លូវ និងដើមឈើ ព្រមទាំងមានទឹកជំនន់តាមដងផ្លូវផងដែរ។ 

៦. ៨០% នៃនិស្សិតវៀតណាមទៅសិក្សានៅក្រៅប្រទេសដោយបង់ថ្លៃសិក្សាខ្លួនឯង មិនចង់ត្រឡប់មកប្រទេសវិញ 

៨០% នៃនិស្សិតវៀតណាមដែលទៅសិក្សានៅបរទេស ដោយបង់ថ្លៃខ្លួនឯង មិនត្រឡប់ទៅប្រទេសវៀតណាមវិញទេ មូលហេតុចម្បង គឺដោយសារពួកគេអាចមានការងារប្រាក់ខែខ្ពស់ និងទទួលបានអត្ថប្រយោជន៍ល្អផ្សេងៗទៀតនៅខាងក្រៅប្រទេស។ នេះបើតាមការចុះផ្សាយរបស់ VnExpress។ 

៧. រដ្ឋបាលរាជធានីភ្នំពេញនឹងរៀបចំប្រណាំងទូកសាកល្បង មុនព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក 

រដ្ឋបាលរាជធានីភ្នំពេញ បានចេញសេចក្តីជូនដំណឹងស្តីពីពិធីប្រណាំងទូកក្របខណ្ឌរាជធានីភ្នំពេញកាលពីថ្ងៃទី៣១ ខែតុលា ឆ្នាំ២០២៤កន្លងទៅថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៤-១៥-១៦ ខែវិច្ឆិកា ឆ្នាំ២០២៤ ខាងមុខនេះ នឹងមានការរៀបចំបណ្តែតប្រទីប អុជកាំជ្រួច ប្រគំតន្ត្រី សម្តែងសិល្បៈ និងកម្មវិធីកម្សាន្ត សប្បាយផ្សេងៗជាច្រើនទៀត។ 

៨. អ្នកស្រី ពាន់ ភួងបុប្ឋា សំណូមពរទៅកាន់ផេកមួយចំនួនយករឿង«កូនប្រសារស្រី» មកផុសជួយដាក់កម្មសិទ្ធបញ្ញាឲ្យម្ចាស់ដើមផង 

ក្រោយពី អ្នកស្រី ពាន់ ភួងបុប្ឋា បានចាក់ផ្សាយឡើងវិញនូវរឿង«កូនប្រសារស្រី» តាមរយៈ Chanel Youtube Poan Phoung Bopha Tv ដែលរឿងភាគនេះជាស្នាដៃនិពន្ធផ្ទាល់របស់អ្នកស្រី ទទួលបានភាពល្បីល្បាញយ៉ាងខ្លាំងកាលពីជាង ១០ឆ្នាំមុន រហូតមកដល់ពេលបច្ចប្បន្នមហាជនកំពុងតែផ្ទុះការគាំទ្រជាថ្មីម្ដងទៀត រហូតមានបណ្ដាផេកមួយចំនួនបានយកទៅផុសចែកចាយបន្តដោយមិនបានដាក់កម្មសិទ្ធបញ្ញាឲ្យម្ចាស់ដើម ទើបអ្នកស្រី ពាន់ ភួងបុប្ឋា ដាច់ចិត្តបង្ហោះជាសំណេរមួយក្នុងបណ្ដាញសង្គមក្នុងន័យសំណូមពរបែបនេះថា៖ «ជម្រាបសួរប្រិយមិត្ត និងអ្នកទស្សនាទាំងអស់គ្នា សូមអរគុណដែលតែងតែតាមដាន និងគាំទ្ររាល់ខ្សែភាពយន្តរបស់នាងខ្ញុំកន្លងមក ។  

៩. សំណុំរឿងឃាតកម្មធ្វើគុតព្រះសង្ឃនៅវត្តពុទ្រារាម ត្រូវកម្លាំងសមត្ថកិច្ចឃាត់ខ្លួនជនដៃដល់ និងបក្ខពួកបានហើយ 

កម្លាំងនាយកដ្ឋាននគរបាលព្រហ្មទណ្ឌដឹកនាំសហការបំបែកសំណុំរឿងឃាតកម្មធ្វើគុតព្រះសង្ឃ នៅវត្តពុទ្រារាម ខេត្តកំពង់ស្ពឺ ដោយឃាត់ខ្លួនជនដៃដល់ និងបក្ខពួកសរុប ៣នាក់ហើយ។ នេះបើតាមការចុះផ្សាយក្នុងគណនីបណ្តាញសង្គមរបស់នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ កាលពីរសៀលថ្ងៃទី១ ខែវិច្ឆិកា ឆ្នាំ២០២៤នេះ។  

១០. អបអរសាទរខួប ២ឆ្នាំ នៃការបើកឲ្យប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុ 

រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តម ប៉េង ពោធិ៍នា បានអញ្ជើញជាអធិបតីក្នុងពិធីអបអរសាទរខួប២ឆ្នាំ នៃការបើកឱ្យប្រើប្រាស់ ផ្លូវល្បឿនលឿនភ្នំពេញ-ក្រុងព្រះសីហនុ។