ការយល់ដឹងពីវិធីនៃការគ្រប់គ្រងពេលវេលាឲ្យមានប្រសិទ្ធភាព នឹងជួយអ្នកឲ្យផលិតនូវកិច្ចការរួចរាល់បានច្រើនជាងមុន ព្រមទាំងជំរុញអ្នកឲ្យឆាប់ទៅដល់គោលដៅផងដែរ។

ដោយសារសារៈសំខាន់នៃការចេះគ្រប់គ្រងពេលវេលា បានបំពេញតួនាទីដ៏ចម្បងក្នុងការងាររបស់អ្នក ដូច្នេះហើយ អ្នកត្រូវរៀនស្វែងយល់ពីវា ហើយអាថ៌កំបាំង៤យ៉ាងខាងក្រោមនេះ នឹងជួយអ្នកក្នុងរឿងនេះបានយ៉ាងមានប្រសិទ្ធភាព៖

១) ផ្ដល់ពេលវេលាឲ្យកិច្ចការសំខាន់ និងបន្ទាន់ជាមុន៖ 

បើអ្នកដឹងថាកិច្ចការណាមានភាពសំខាន់ និងបន្ទាន់ជាងគេ នោះអ្នកគួរតែផ្ដល់អាទិភាពទៅលើវាមុនគេ ហើយពេលខ្លះការងារទាំងនោះហើយ ដែលទាមទារឲ្យអ្នកចំណាយពេលដ៏ច្រើនទៅលើវា។ ម្យ៉ាងទៀត ការសម្រេចកិច្ចការដែលលំបាកជាមុន អាចបង្កើតនូវអារម្មណ៍ធូរស្រាលដល់អ្នកសម្រាប់បំពេញកិច្ចការដទៃៗទៀតដែលនៅសេសសល់បាន។

២) បិទចោលនូវបណ្ដាញទំនាក់ទំនងសង្គមរបស់អ្នក៖ 

ការបង្កើតលេសឲ្យខ្លួនឯងដោយនិយាយថានឹងឆែកមើលពត៌មានថ្មីៗត្រឹមតែប៉ុន្មាននាទី គឺជាអ្នកដែលទាញយកពេលវេលារបស់អ្នកទៅច្រើនយ៉ាងពិតប្រាកដ ព្រោះថាតែប៉ុន្មាននាទីអាចក្លាយជាច្រើនម៉ោង នោះអ្នកនឹងខាតបង់ពេលវេលាអស់ច្រើន ដើម្បីបំពេញកិច្ចការរបស់អ្នកមិនខាន។ ហេតុនេះ នៅពេលអ្នកផ្ដោតលើការងារ អ្នកចាំបាច់ត្រូវបិទវាចោល ព្រមទាំងចាកចេញពីរឿងមិនសំខាន់ផ្សេងៗទៀតដែលរំខានអ្នកផងដែរ។

៣) ត្រូវដឹងថាពេលណាត្រូវបដិសេធចំពោះរឿងមួយចំនួន៖

 ថ្វីត្បិតតែការទទួលបន្ទុកលើការងារច្រើន មានផលវិជ្ជមានរបស់វា ប៉ុន្តែអ្នកក៏ត្រូវដឹងថាតើអ្នកអាចរ៉ាប់រងវាទាំងអស់បានដែរឬទេ ពុំនោះទេអ្នកនឹងផលិតបានការងារច្រើនដែលគ្មានគុណភាពជាក់ច្បាស់ហើយ។ ឬក៏អ្នកអាចស្វែងរកជំនួយពីនរណាម្នាក់មកជួយសម្រាលការងាររបស់អ្នក ក៏ជាដំណោះស្រាយដ៏ល្អមួយដែរ។

៤) មិនត្រូវធ្វើការងារច្រើនក្នុងពេលតែមួយ៖

 ស្របពេលដែលមនុស្សមួយចំនួនពូកែធ្វើការងារច្រើនក្នុងពេលតែមួយ រីឯអ្នកខ្លះទៀតមិនពូកែ ហើយបើអ្នកនៅក្នុងចំណោមមនុស្សប្រភេទទី២នេះ អ្នកគួរងាកមកផ្ដោតតែទៅលើកិច្ចការមួយៗឲ្យបានច្បាស់លាស់ នោះអ្នកនឹងសម្រេចកិច្ចការទាំងអស់បានយ៉ាងឆាប់រហ័សជាងមុន៕