ខេត្តរតនគីរី៖ យុវជនចិត្តខ្លាំងម្នាក់ខឹងឪពុកម្តាយស្តីបន្ទោសឲ្យបន្តិចបន្តួច ក៏រត់ទៅយកសាំងដុតខ្លួនឯងរងរបួសធ្ងន់ធ្ងរ។ ហេតុការណ៍នេះបានកើតឡើងនៅវេលាម៉ោង៥ និង៤៨នាទីល្ងាច ថ្ងៃអង្គារម្សិលមិញ ស្ថិតនៅក្នុងភូមិភ្នំកុកព្រៅ ឃុំភ្នំកុក ស្រុកវើនសៃ ខេត្តរតនគីរី។

សមត្ថកិច្ចមូលដ្ឋានបានឲ្យដឹងថា ជនរងគ្រោះឈ្មោះ សាវើយ មិម ភេទប្រុស អាយុ ២៨ឆ្នាំ ជនជាតិព្រៅ មានទីលំនៅភូមិ-ឃុំកើតហេតុ។

ប្រភពបន្តថា មុនពេលកើតហេតុ ជនរងគ្រោះបានផឹកស្រាស្រវឹង ក៏សុំលុយឪពុកម្តាយដើរលេង ឪពុកម្តាយបានស្តីបន្ទោសថា កូនស្រវឹងស្រាហើយ កុំដើរលេងអី ប្រយ័ត្នមានគ្រោះថ្នាក់ ។ គ្រាន់តែពាក្យទូន្មានបន្តិចបន្ទួចនេះ ធ្វើឲ្យយុវជនចិត្តសឿង បានយកប្រេងសាំងកន្លះលីត្រចាក់ពីលើដងខ្លួន ហើយដុតខ្លួនឯងតែម្តង។ ក្រោយកើតហេតុជនរងគ្រោះត្រូវបានសាច់ញាតិដឹកបញ្ជូនទៅសង្គ្រោះបន្ទាន់នៅឯមណ្ឌលសុខភាពស្រុកវើនសៃ៕ អត្ថបទដោយៈ អ៊ិត តុលា