ភ្លើងឆេះព្រៃកំពុងរីករាលដាលយ៉ាងឆាប់រហ័សឆ្ពោះទៅកាន់កណ្តាលទីក្រុង Otsuchi ក្នុងខេត្ត Iwate ភាគខាងជើងប្រទេសជប៉ុន។ អាជ្ញាធរបានបញ្ជាឱ្យប្រជាជនជាង ២,៥០០ នាក់ជម្លៀសចេញ ខណៈដែលអណ្តាតភ្លើងពីភ្លើងឆេះព្រៃបានខិតជិតផ្ទះសម្បែងជាច្រើន។

ភ្លើងឆេះបានផ្ទុះឡើងនៅថ្ងៃទី ២២ ខែមេសា នៅតំបន់ភ្នំ ហើយបានឆេះព្រៃជាង ៤០០ ហិកតារួចទៅហើយ។ ផ្សែងក្រាស់ៗហុយចេញពីព្រៃឈើក្បែរនោះ ដោយមានអណ្តាតភ្លើងដែលអាចមើលឃើញកំពុងរាលដាលដល់តំបន់លំនៅដ្ឋាន ដែលបង្កឱ្យមានការជូនដំណឹងជាបន្ទាន់។ អ្នកពន្លត់អគ្គិភ័យប្រហែល ៧០០ នាក់ និងយន្តហោះចំនួន ១៣ គ្រឿងកំពុងប្រយុទ្ធប្រឆាំងនឹងភ្លើងឆេះក្រោមស្ថានភាពដីដ៏លំបាក។ គិតត្រឹមព្រឹកថ្ងៃសុក្រ មនុស្ស ៣២៩ នាក់កំពុងជ្រកកោននៅកន្លែងសុវត្ថិភាព ដោយមិនមានរបាយការណ៍អំពីអ្នកស្លាប់ និងរបួសរហូតមកដល់ពេលនេះទេ។ អ្នកនាំពាក្យរដ្ឋាភិបាល បានសង្កត់ធ្ងន់លើការចល័តកម្លាំងជាបន្តបន្ទាប់ដើម្បីពន្លត់ភ្លើង

គួរបញ្ជាក់ផងដែរថា ទីក្រុង Iwate ធ្លាប់ប្រឈមមុខនឹងភ្លើងឆេះព្រៃធ្ងន់ធ្ងរពីមុនមក រួមទាំងភ្លើងឆេះព្រៃដ៏អាក្រក់បំផុតរបស់ប្រទេសជប៉ុនក្នុងរយៈពេលជាច្រើនទសវត្សរ៍កាលពីឆ្នាំមុននៅ Ofunato ក្បែរនោះ។ រដូវរងាស្ងួតបានបង្កើនហានិភ័យនៅទូទាំងតំបន់ ដែលធ្វើឱ្យស្មុគស្មាញដល់កិច្ចខិតខំប្រឹងប្រែងទប់ស្កាត់៕