ភ្នំពេញ៖ ក្រសួងអប់រំ យុវជន និងកីឡា សហការជាមួយ គណៈកម្មាធិការជាតិ អូឡាំពិកកម្ពុជា សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) និងគ្រឹះស្ថានមីក្រូហិរញ្ញវត្ថុ អម្រឹត គ្រោងនឹងរៀបចំព្រឹត្តការណ៍ «១ ម៉ឺនជំហាន ដើម្បីសិស្ស ១ ម៉ឺននាក់» ក្រោមប្រធានបទ «រត់ ដើរ ដើម្បីលើកកម្ពស់ការអាន និងសារមន្ទីរ ស.ស.រ» ដែលគ្រោងនឹងប្រព្រឹត្តទៅនៅថ្ងៃអាទិត្យ ទី២៤ ខែឧសភា ឆ្នាំ២០២៦ នៅបរិវេណកោះពេជ្រ និងកោះនរា។

ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងតំណាងគណៈកម្មាធិការជាតិ អូឡាំពិកកម្ពុជា បានបញ្ជាក់ថា ព្រឹត្តិការណ៍នេះជាយុទ្ធនាការផ្សព្វផ្សាយដំបូងមួយនៅកម្ពុជា ដែលផ្តួចផ្តើមដោយគ្រឹះស្ថានអម្រឹត ដោយមានគោលបំណងសំខាន់៣ រួមមាន៖ ១) ការចូលរួមលើកកម្ពស់វិស័យអប់រំ ២) ការផ្សព្វផ្សាយវប្បធម៌អាន និងការលើកស្ទួយការយល់ដឹងអំពីប្រវត្តិសាស្ត្ររូបិយវត្ថុខ្មែរ តាមរយៈសារមន្ទីរ ស.ស.រ។

ឯកឧត្តមបានបន្ថែមថា យុទ្ធនាការនេះបង្ហាញពីចក្ខុវិស័យរួមដ៏មានសារៈសំខាន់ ក្នុងការចូលរួមអភិវឌ្ឍធនធានមនុស្ស និងលើកកម្ពស់សង្គមសេដ្ឋកិច្ចជាតិឱ្យមានភាពចីរភាព។ ព្រមទាំងអំពាវនាវឱ្យសាធារណៈជនចូលរួមគាំទ្រយ៉ាងសកម្ម ដើម្បីបង្កើតទម្លាប់អាន និងបំផុសវប្បធម៌អានឱ្យក្លាយជាផ្នែកមួយនៃជីវិតប្រចាំថ្ងៃ។

លោក ប្លែស គឺលីយ៉ង់ សហប្រធានសារមន្ទីរ ស.ស.រ បានលើកឡើងថា សារមន្ទីរនេះមិនត្រឹមតែជាកន្លែងអភិរក្សបេតិកភណ្ឌទេ ប៉ុន្តែជាគ្រឹះស្ថានអប់រំមួយសំខាន់ ដែលផ្តោតលើការចែករំលែកចំណេះដឹង និងបង្កើនការយល់ដឹងរបស់យុវជន។ លោកបានបញ្ជាក់ថា ការចូលរួមជាមួយគម្រោងនេះ គឺជាជំហានថ្មីមួយក្នុងការពង្រឹងកិច្ចសហការជាមួយវិស័យធនាគារ និងអប់រំ ដើម្បីលើកកម្ពស់ចំណេះដឹងសេដ្ឋកិច្ច និងប្រវត្តិសាស្ត្រ ក្នុងចំណោមយុវជនជំនាន់ក្រោយ។

ជាមួយគ្នានេះ លោក ដុស ឌីន អគ្គនាយកគ្រឹះស្ថានមីក្រូហិរញ្ញវត្ថុ អម្រឹត បានឲ្យដឹងថា កម្មវិធីនេះមិនត្រឹមតែជាសកម្មភាពកីឡាដើម្បីលើកកម្ពស់ការអានប៉ុណ្ណោះទេ ប៉ុន្តែជាវេទិកាធំមួយសម្រាប់អង្គភាពពាក់ព័ន្ធទាំងអស់ រួមទាំងរាជរដ្ឋាភិបាល ដៃគូអភិវឌ្ឍន៍ វិស័យឯកជន អ្នកនិពន្ធ និងសហគមន៍ ចូលរួមផ្សព្វផ្សាយតម្លៃនៃការអានឱ្យទូលំទូលាយ។

លោកបន្ថែមថា ថវិកាដែលប្រមូលបានពីការចុះឈ្មោះ និងការឧបត្ថម្ភបន្ថែមពីអម្រឹត នឹងត្រូវយកទៅគាំទ្រការរៀបចំទិវាជាតិអំណាន និងពិព័រណ៍សៀវភៅថ្នាក់ជាតិ ព្រមទាំងរៀបចំដំណើរទស្សនកិច្ចសិក្សាសម្រាប់សិស្សប្រមាណ ១ ម៉ឺននាក់ ពីបណ្តាខេត្តនានា មកទស្សនាសារមន្ទីរ ស.ស.រ និងផ្សព្វផ្សាយអំពីសារៈសំខាន់នៃការអាននៅតាមតំបន់ផ្សេងៗទៀតផងដែរ៕