នៅវេលាម៉ោង ១១:៣០នាទីយប់ថ្ងៃទី១៨ ខែមេសា ឆ្នាំ២០២៦ មានករណីគ្រោះធម្មជាតិបានកើតឡើងដោយភ្លៀងមួយមេធំ លាយឡំនឹងខ្យល់កន្ត្រាក់ បណ្តាលឲ្យផ្ទះរបស់ប្រជាពលរដ្ឋ ៣៥ខ្នង ដួលរលំខូចខាតទាំងស្រុង និងមួយចំនួនប៉ើងរបើកដំបូល ដោយក្នុងនោះក៏បណ្តាលឲ្យមនុស្ស ៦នាក់ រងរបួស ហេតុការណ៍នេះកើតឡើង នៅចំនុចឃុំផ្លូវទូក ស្រុកកំពង់លែង ខេត្តកំពង់ឆ្នាំង។

យោងតាមការឱ្យដឹងពីមន្ត្រីអាជ្ញាធរមូលដ្ឋាន បានឲ្យដឹងថា មានភ្លៀងធ្លាក់ និងខ្យល់កន្ត្រាក់បានបោកបក់យ៉ាងខ្លាំងមកប៉ះចំផ្ទះរបស់ប្រជាពលរដ្ឋ ៣ភូមិ ក្នុងឃុំផ្លូវទូក ស្រុកកំពង់លែង ខេត្តកំពង់ឆ្នាំង។ ក្នុងនោះភូមិពាមខ្នង បណ្តាលឲ្យផ្ទះ៦ខ្នងដួលរលំខូចខាតទាំងស្រុង និង១៥ខ្នងប៉ើងរបើកដំបូល។ ចំណែកភូមិថ្នល់ឈើទាលប៉ើងរបើកដំបូល១៣ខ្នង និងភូមិស្លត ប៉ើងរបើកដំបូល១ខ្នង។

ក្រោយកើតហេតុមន្ត្រីអាជ្ញាធរមូលដ្ឋានបញ្ជូនអ្នករងរបួសមកព្យាបាលនៅមណ្ឌលសុខភាពផ្លូវទូក និងមណ្ឌលសុខភាពកំពង់ហៅ ស្រុកកំពង់លែងផងដែរ៕