លោក Nawat Itsaragrisil នាយកបវរកញ្ញាចក្រវាលថៃ សុំទោសចំពោះភាពចម្រូងចម្រាសដោយបាននិយាយថាលោកស្ថិតនៅក្រោមសម្ពាធជាច្រើន។

ក្នុងពិធីស្វាគមន៍បវរកញ្ញាចក្រវាលឆ្នាំ២០២៥ នៅយប់ថ្ងៃទី៥ ខែវិច្ឆិកា នេះនាយកនៃកម្មវិធីប្រកួតបវរកញ្ញាចក្រវាលថៃ លោក Nawat Itsaragrisil បានសុំទោសចំពោះភាពចម្រូងចម្រាសថ្មីៗជុំវិញការប្រលងឆ្នាំនេះ ខណៈលោកត្រូវបានគេមើលឃើញថាបានស្តីបន្ទោសបេក្ខនារីនៃបវរកញ្ញាចក្រវាលឆ្នាំ២០២៥ និងចំពោះបវរកញ្ញាចក្រវាលម៉ិកស៊ិក Fatima Bosch ចំពោះការមិនបង្ហោះផ្សព្វផ្សាយពីប្រទេសថៃ។

ក្នុងអំឡុងពេលប្រឈមមុខគ្នា លោក Nawat ហាក់ដូចជាប្រមាថ បវរកញ្ញាចក្រវាលម៉ិកស៊ិក Fatima Bosch ដោយនិយាយថា «ប្រសិនបើអ្នកធ្វើតាមបញ្ជាពីនាយកជាតិ (National Director) របស់អ្នក អ្នកគឺជាមនុស្សល្ងង់»។

ចាប់តាំងពីពេលនោះមក ហេតុការណ៍នេះបានធ្វើឱ្យមានការខឹងសម្បារនៅទូទាំងពិភពលោក ដោយលោក Raul Rocha ប្រធានកម្មវិធីប្រកួតបវរកញ្ញាចក្រវាលបានថ្កោលទោសសកម្មភាពរបស់ លោក Nawat Itsaragrisil ដោយបន្ថែមថាលោកនឹងដាក់កម្រិតលើការចូលរួមរបស់លោក Nawat នៅក្នុងព្រឹត្តិការណ៍ដែលទាក់ទងនឹងការប្រកួតនៅឆ្នាំនេះ។

កាល​ពី​យប់​ថ្ងៃ​ពុធ ក្នុង​ពិធី​ស្វាគមន៍​បវរកញ្ញា​ចក្រវាល​ឆ្នាំ ២០២៥ លោក Nawat Itsaragrisil បាន​ចេញ​ការ​សុំទោស​ដោយ​លើក​ឡើង​ថា​ លោក​ស្ថិត​ក្រោម​សម្ពាធ​ខ្លាំង។ លោកថា៖«ខ្ញុំគិតថាអ្នកត្រូវតែយល់ថាសម្ពាធគឺខ្លាំងណាស់។ ខ្ញុំជាមនុស្ស ពេលខ្លះខ្ញុំមិនអាចគ្រប់គ្រងបាន[.....] និយាយអញ្ចឹង ខ្ញុំគ្មានចេតនាធ្វើបាបអ្នកណាទេ ព្រោះខ្ញុំគោរពអ្នកទាំងអស់គ្នា... ខ្ញុំត្រូវតែនិយាយ ខ្ញុំសុំទោសដែលវាបានកើតឡើង»។

លោក​បាន​បន្ថែម​ថា​ ​ប្រសិន​បើ​អ្នក​ណា​មិន​ស្រួល​នឹង​អ្វី​ដែល​បាន​កើត​ឡើង​នោះ​គឺលោក​សោកស្ដាយ​ខ្លាំង​ណាស់ បន្ទាប់មកលោកបានប្រឈមមុខនឹងបេក្ខនារី Miss Universe ២០២៥ ហើយបានឱនសុំទោសពួកគេ៕