ព្រះ​នាង ​នរោត្តម ជេន​ណា​ បង្ហាញព្រះទ័យរំភើប និងមានមោទកភាពយ៉ាងខ្លាំង ចំពោះតារាចម្រៀងអ្នកនាង ទេព បូព្រឹក្ស និងលោក G Devith ដែលបាន​នាំយកនូវទស្សនីយភាពដ៏អស្ចារ្យបង្ហាញពីសិល្បៈវប្បធម៌ខ្មែរ រួមបញ្ជូលជាមួយសម័យ នៅលើកឆាកអន្តរជាតិ ក្នុងប្រទេសហ្វីលីពីន ទទួលបានការចាប់អារម្មណ៍ខ្លាំងពីអ្នកទស្សនាចម្រុះជាតិសាសន៍ ជាពិសេសគឺបានធ្វើឲ្យគ្រប់គ្នាបានស្គាល់កាន់តែច្បាស់ពីវប្បធម៌ខ្មែរ។

នេះបើយោងតាមសំណេររបស់ ព្រះនាង ជេនណា លើកឡើងដូចនេះថា៖ « ខ្ញុំពិតជារំភើប និងមានមោទកភាពណាស់ ចំពោះការសម្ដែងដ៏អស្ចារ្យរបស់បងទាំងពីរ G-Devith Tep Boprek ពិតជាសិល្បករ សិល្បការិនីកំពូលនៃកម្ពុជា ដែលបាននាំយកព្រលឹងវប្បធម៌ខ្មែរ ទៅរះយ៉ាងចិញ្ចាំងចិញ្ចាចលើឆាកអន្ដរជាតិASEAN-Korea Music Festival 2026 ROUNDក្នុងប្រទេសហ្វីលីពីន មិនថានៅក្នុងស្រុក ឬនៅក្រៅប្រទេស បងទាំងពីរតែងតែរំលេច និងលើកបង្ហាញពីសិល្បៈខ្មែរជានិច្ចលើការសម្ដែង ជាពិសេស នៅលើម៉ូដសម្លៀកនីមួយៗ ហើយខ្ញុំសង្ឃឹមថា បងៗទាំងពីរ មានឱកាសកាន់តែច្រើនបន្តទៀត ក្នុងការផ្សព្វផ្សាយពីវប្បធម៌ជាតិ ទៅកាន់បរទេស»។

សូមបញ្ជាក់ផងដែរថា នេះជាលើក ទី២ហើយ ដែលអ្នកនាង ទេព បូព្រឹក្ស និងលោក G Devith បានក្ដោបក្ដាប់ឱកាសទៅសម្ដែងលើកឆាកអន្តរជាតិ ជាពិសេសតារាចម្រៀងគូនេះមិនដែលភ្លេចសោះឡើយនៅការនាំយកនៅវប្បធម៌ខ្មែរទៅបង្ហាញ ដែលនេះជាឆន្ទៈមួយក្នុងការចូលថែរក្សាការពារ និងជួយផ្សព្វផ្សាយផងដែរ៕ អត្ថបទដោយ៖ Sun Darasy