ល្មិច ឬអណ្តើកសមុទ្រ ត្រូវបានកិបលេខសម្គាល់ និងលែងចូលសមុទ្រវិញ បន្ទាប់ពីកម្លាំងប្រចាំការនៅស្នាក់ការសន្តិសុខកោះពោធិ៍ ទទួលបានពីអ្នកនេសាទនៅតំបន់នោះ។ 

លោក ហ៊ួរ មិថុនា អភិបាលរងខេត្ត ទទួលបន្ទុកមន្ទីរកសិកម្ម រុក្ខាប្រមាញ់ និងនេសាទខេត្តកែប រួមជាមួយ លោកឧត្តមនាវីទោ លី ហួត មេបញ្ជាការទីបញ្ជាការជួរមុខ អគ្គលេខាធិការដ្ឋាននៃគណៈកម្មាធិការជាតិសន្តិសុខលម្ហសមុទ្រ និងតំណាងអង្គការអភិរក្សសមុទ្រកម្ពុជា បានធ្វើការលែងអណ្តើកសមុទ្រ (ល្មិច) មួយក្បាល ត្រឡប់ទៅសមុទ្រវិញ បន្ទាប់ពីអ្នកនេសាទនៅកោះពោធិ៍ ប្រគល់ជូនស្នាក់ការសន្តិសុខកោះពោធិ៍ ក្រោយល្មិចខាងលើបានជាប់ខ្សែលបដោយចៃដន្យ។ 

ល្មិច ឬអណ្តើកសមុទ្រ ត្រូវបានចាត់ទុកជាប្រភេទធនធានជលផលសមុទ្រដែលកំពុងរងគ្រោះថ្នាក់ ដែលត្រូវការការពារ។ នេះជាលើកទី៨ហើយ ដែលប្រជាពលរដ្ឋជាអ្នកនេសាទនៅកោះពោធិ៍ នេសាទបានដោយចៃដន្យ ហើយបានប្រគល់ជូនកម្លាំងប្រចាំការ ដើម្បីលែងចូលតំបន់សុវត្ថិភាពវិញ៕