រយៈពេលបីថ្ងៃនៃពិធីបុណ្យចូលឆ្នាំថ្មីប្រពៃណីជាតិ ចាប់ពីថ្ងៃទី១៤ ដល់ ១៦ ខែមេសា មានប្រជាពលរដ្ឋដើរកម្សាន្តចំនួនប្រមាណជាង ២១លាននាក់ ខណៈភ្ញៀវទេសចរបរទេសជាង៧ម៉ឺននាក់ផងដែរ។

យោងតាមស្ថិតិភ្ញៀវទេសចរជាតិ និងទេសចរបរទេស ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ នៅតាមបណ្តារាជធានី ខេត្ត រយៈពេលបីថ្ងៃ ចាប់ពីថ្ងៃទី១៤-១៦ ខែមេសា ឆ្នាំ២០២៦ ទេសចរ និងប្រជាពលរដ្ឋដើរលេងកម្សាន្ត សរុបប្រមាណ ២១ ០៩២ ៤៤៦នាក់។

របាយការណ៍បង្ហាញថា ទេសចរជាតិស្នាក់នៅ ប្រមាណ ១ ១៤៥ ៤៥០នាក់ ប្រជាពលរដ្ឋដើរលេងកម្សាន្ត ប្រមាណ ១៩ ៨៧៥ ៨០៥ នាក់ ហើយក្នុងនោះ ទេសចរបរទេស ប្រមាណ ៧១ ១៩១ នាក់។ រាជធានី ខេត្តចំនួន ៤ ទទួលបានទេសចរច្រើនជាងគេរួមមាន៖ រាជធានីភ្នំពេញ៖ ៤ ៤០២ ០៩២ នាក់ ខេត្តកំពង់ចាម ៤ ១៧៨ ៦២៣ នាក់ខេត្តព្រៃវែង ២ ៣២៣ ០៩៦ នាក់ ខេត្តសៀមរាប ១ ៧៩២ ៤៣៨ នាក់ និងខេត្តកំពង់ស្ពឺ ១ ៧១២ ០០០ នាក់។

ទោះបីជាពិធីបុណ្យចូលឆ្នាំថ្មីប្រពៃណីជាតិខ្មែររយៈពេល៣ថ្ងៃតាមទំនាមទម្លាប់បានបិទបញ្ចប់កាលពីថ្ងៃទី១៦ ខែមេសា ឆ្នាំ ២០២៦ ក៏ដោយ ក៏ប៉ុន្តែ ក្តីសប្បាយរីករាយនៅតែដក់ជាប់ក្នុងអារម្មណ៍ប្រជាពលរដ្ឋគ្រប់រូបមិនទាន់ចប់នៅឡើយទេ ខណៈការរៀបចំព្រឹត្តិការណ៍នគរសង្ក្រាន្តនៅរាជធានីភ្នំពេញនឹងបន្តរហូតដល់ថ្ងៃទី១៩ ខែមេសា ឆ្នាំ២០២៦។

សម្តេចធិបតីបញ្ជាក់ថា «ការរៀបចំព្រឹត្តិការណ៍នគរសង្ក្រាន្តនៅរាជធានីភ្នំពេញ និងសង្ក្រាន្តទូទាំងប្រទេសគឺដើម្បីលើកកម្ពស់វប្បធម៌ ប្រពៃណី ថែរក្សាអត្តសញ្ញាណជាតិខ្មែរ និងបម្រើដល់ស្នាមញញឹមមហាគ្រួសារខ្មែរ ជាពិសេសក៏បានផ្សារភ្ជាប់ជួរក្រោយជាមួយនឹងជួរមុខជាប់ជានិច្ច ដែលជាកម្លាំងចិត្តមិនអាចខ្វះបាន៕