ក្នុងឆ្នាំ២០២៦ នេះ ត្រពាំងធម្មជាតិចំនួន៣ ស្ថិតនៅក្នុងដែនជម្រកសត្វព្រៃលំផាត់ ត្រូវបានស្តារឡើងវិញ ដើម្បីរក្សាទឹកឲ្យបានយូដើម្បីបម្រើដល់សត្វព្រៃ។ ការខ្វះទឹកក្នុងរដូវប្រាំង បានក្លាយជាបញ្ហាប្រឈមធ្ងន់ធ្ងរ ដែលគំរាមកំហែងដល់ជីវិត និងការរស់រានរបស់សត្វព្រៃនៅតំបន់នេះ។

ត្រពាំងទាំងនេះមានតួនាទីយ៉ាងសំខាន់ក្នុងការរក្សាទឹក ទ្រទ្រង់ប្រព័ន្ធអេកូឡូស៊ី និងគាំទ្រការអភិរក្សជីវៈចម្រុះ។ ការជ្រើសរើសទីតាំងសម្រាប់ស្តារត្រូវបានធ្វើឡើងដោយផ្អែកលើលក្ខណៈភូមិសាស្ត្រ និងតំបន់ដែលសត្វព្រៃពឹងផ្អែកខ្ពស់ ជាពិសេសសត្វត្រយងជិតផុតពូជបំផុតទាំងពីរប្រភេទគឺត្រយងយក្ស និងត្រយងចង្កំកស។

ការមានប្រភពទឹកគ្រប់គ្រាន់នៅតាមទីតាំងផ្សេងៗគ្នា នឹងជួយកាត់បន្ថយការប្រមូលផ្តុំសត្វព្រៃនៅកន្លែងតែមួយ ដែលជាកត្តាសំខាន់ក្នុងការកាត់បន្ថយហានិភ័យនៃការចម្លងជំងឺ និង ការពារសត្វព្រៃពីការយាយីផ្សេងៗផងដែរ៕