វេទិកាសារព័ត៌មាន លើប្រធានបទ «រួមគ្នាផលិត រួមគ្នាប្រើផលិតផលជាតិ» ដើម្បីពង្រឹង និងពង្រីកផលិតផលក្នុងស្រុកទាំងបរិមាណ គុណភាព និងសុវត្ថិភាព ធ្វើយ៉ាងណាបំពេញតម្រូវការប្រើប្រាស់អំឡុងពេលពហិការមិនប្រើប្រាស់ផលិតផលប្រទេសថៃ រៀបចំឡើងដោយក្លិបអ្នកកាសែតកម្ពុជា (ក.អ.ក) សហការជាមួយជាមួយសមាគមមូលនិធិ សម្ដេចតេជោ ដើម្បីអភិវឌ្ឍន៍ សហគ្រាសធុនតូច និង មធ្យមនៅកម្ពុជា (FASMEC) នាព្រឹកថ្ងៃទី៣ ខែមេសា ឆ្នាំ២០២៥ ក្រោមវត្តមាន លោក ពុយ គា ប្រធានក្លិបអ្នកកាសែតកម្ពុជា និង ឧកញ៉ា តែ តាំងប៉ ប្រធានក្រុមប្រឹក្សាភិបាលនៃសមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា(SME) និងជាប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យម (FASMEC) និងអ្នកសារព័ត៌មានប្រមាណ ៨៥នាក់ មកពី ៦០អង្គភាព។ក្នុងឱកាសនោះដែរ ឧកញ៉ា តែ តាំងប៉ បានមានប្រសាសន៍ថា បទពិសោធន៍ពីការរៀបចំពិព័រណ៍កាលពីពីរលើកមុន ទទួលបានការគាំទ្រយ៉ាងច្រើនកុះករពីសំណាក់ប្រជាពលរដ្ឋខ្មែរ ជាពិសេសបន្ទាប់ពីប្រជាពលរដ្ឋខ្មែរ ងាកមកឲ្យតម្លៃលើផលិតក្នុងស្រុក។ ហេតុនេះហើយទើប FASMEC សម្រេចរៀបចំពិព័រណ៍ «ផលិតផលខ្មែរ» ជាលើកទី៣។

ជាមួយគ្នានេះ ឧកញ៉ា តែ តាំងប៉ អំពាវនាវឲ្យប្រជាពលរដ្ឋបន្តគាំទ្រផលិតផលខ្មែរ និងជឿជាក់លើផលិតផលដែលដាក់តាំងបង្ហាញខាងមុខគឺសុទ្ធសឹងតែជាផលិតផល ដែលផលិតឡើងដោយកូនខ្មែរ និងធានាថារាល់តម្លៃផលិតផលដែលតាំងបង្ហាញក្នុងពិព័រណ៍ផលិតផលក្នុងស្រុក និងស្នាដៃកូនខ្មែរ លើកទី៣ នឹងមិនមានការឡើងថ្លៃនោះទេ បើទោះបីក្នុងកាលៈទេសៈប្រេងឥន្ធនៈ និងហ្គាសឡើងថ្លៃក៏ដោយ។

គួរបញ្ជាក់ផងដែរថា ពិព័រណ៍ផលិតផលក្នុងស្រុក និងស្នាដៃកូនខ្មែរ លើកទី៣ នឹងរៀបចំឡើងសាជាថ្មី ចាប់ពី ម៉ោង ៨ព្រឹក ដល់ម៉ោង ៨យប់ ចំនួន ៤ថ្ងៃ ថ្ងៃទី ៩,១០,១១ និងទី១២ ខែមេសា ឆ្នាំ២០២៦ ខាងមុខនេះ នៅមជ្ឈមណ្ឌលសន្និបាត និងពិព័រណ៍កោះពេជ្រផងដែរ៕