យន្តហោះដឹកជញ្ជូនយោធាកូឡុំប៊ីមួយគ្រឿងដែលដឹកមនុស្ស ១២១ នាក់នៅលើយន្តហោះ ដែលភាគច្រើនជាទាហាន បានធ្លាក់ភ្លាមៗបន្ទាប់ពីហោះឡើងកាលពីថ្ងៃច័ន្ទ (ថ្ងៃទី ២៣ ខែមីនា) នៅភាគនិរតីនៃប្រទេសកូឡុំប៊ី ដោយបានសម្លាប់មនុស្សយ៉ាងហោចណាស់ ៣៣នាក់ និងរបួស ៨១នាក់។

យន្តហោះដឹកទំនិញ Lockheed Martin Hercules C‑130 របស់កងទ័ពអាកាសកូឡុំប៊ី ដែលបានធ្លាក់ភ្លាមៗបន្ទាប់ពីហោះឡើងពី Puerto Leguizamo ដែលជាទីក្រុងតូចមួយនៅជិតព្រំដែនជាមួយប្រទេសប៉េរូ និងអេក្វាឌ័រ។ យន្តហោះនេះកំពុងដឹកជញ្ជូនទាហានចំនួន ១១០ នាក់ និងសមាជិកនាវិកចំនួន ១១ នាក់ទៅកាន់ទីតាំងមួយផ្សេងទៀតនៅក្នុងខេត្ត Putumayo បានធ្លាក់ និងផ្ទុះជាអណ្តាតភ្លើងយ៉ាងសន្ធោសន្ធៅ។ អាជ្ញាធរបានបញ្ជាក់ថា តួលេខអ្នកស្លាប់អាចនឹងកើនឡើងបន្ថែមទៀត។ អ្នករស់រានមានជីវិត ត្រូវបានទាញចេញពីគំនរបាក់បែកដោយសាររបួស ហើយត្រូវបានដឹកជញ្ជូនតាមអាកាសទៅកាន់ទីក្រុងធំៗ ដើម្បីព្យាបាល ។

រដ្ឋមន្ត្រីក្រសួងការពារជាតិកូឡុំប៊ី លោក Pedro Sánchez បានពិពណ៌នាអំពីហេតុការណ៍នេះថា ជាគ្រោះថ្នាក់ដ៏សោកសៅ ហើយបាននិយាយថា រដ្ឋាភិបាលកំពុងដាក់ពង្រាយធនធានដែលមានទាំងអស់ដើម្បីជួយជនរងគ្រោះ និងធានាសុវត្ថិភាពតំបន់ជុំវិញកន្លែងកើតហេតុ។ កងទ័ពអាកាសបានបើកការស៊ើបអង្កេតលើមូលហេតុ ខណៈដែលប្រធានាធិបតី Gustavo Petro បានចេញសាររំលែកទុក្ខដល់ក្រុមគ្រួសារជនរងគ្រោះ និងកោតសរសើរចំពោះកិច្ចខិតខំប្រឹងប្រែងឆ្លើយតបរបស់អាជ្ញាធរមូលដ្ឋាន និងទាហាននៅលើដី៕