ប៉ូលិស​នៅ​ទីក្រុង​ហូជីមិញ​បាន​ចាប់ខ្លួន​លោកស្រី Kieu Hoang Nha អាយុ៣៨ ឆ្នាំ ជា​នាយក​ក្រុមហ៊ុន Hikachi Pharmaceutical and Cosmetics រួមជាមួយ​លោកស្រី Lam Thi Kim Nuong អាយុ ៤៣ឆ្នាំ និង​មនុស្ស​ ៣នាក់​ផ្សេងទៀត​កាលពី​ថ្ងៃទី២០ ខែមីនា ពីបទផលិត និងជួញដូរគ្រឿងសម្អាងក្លែងក្លាយ។

ក្នុងអំឡុងពេលត្រួតពិនិត្យ អាជ្ញាធរបានរឹបអូសផលិតផលជាង ១០,០០០ ដបដែលមានឈ្មោះម៉ាក OLAY, ABUTINE C3C, Bach Ngoc Lien, Vaseline ជាដើម។ ផលិតផលទាំងអស់ត្រូវបានដាក់ស្លាកថា ផលិតនៅសហរដ្ឋអាមេរិក ឬ ផលិតនៅប្រទេសថៃ ប៉ុន្តែខ្វះឯកសារបញ្ជាក់ពីប្រភពដើមរបស់វា។ សារធាតុគីមី និងឡេលាបស្បែកដែលមិនស្គាល់ប្រភពដើមត្រូវបានលាយបញ្ចូលគ្នា និងដាក់ដបដោយដៃដោយប្រើឧបករណ៍មិនត្រឹមត្រូវ។ ក្រុមនេះដំណើរការផលិត ដោយទិញ​វត្ថុធាតុដើម​ថោកៗ ការលាយ ការបោះពុម្ពវេចខ្ចប់ រហូតដល់ការចែកចាយ។ ក្រុមហ៊ុន Nha ផលិតឡេលាបស្បែកក្លែងក្លាយម៉ាក OLAY, Vaseline, ABUTINE C3C និង Bach Ngoc Lien ដោយផ្ទាល់តាមការបញ្ជាទិញ បន្ទាប់មកផ្ទេរផលិតផលពាក់កណ្តាលសម្រេចទៅឱ្យក្រុមហ៊ុន Nuong ដើម្បីបញ្ចប់។​

ចាប់ពីឆ្នាំ ២០២៥ រហូតមកដល់បច្ចុប្បន្ន ក្រុមនេះបាននាំយកទំនិញក្លែងក្លាយមួយចំនួនធំមកកាន់ទីផ្សារ ដោយរកប្រាក់ចំណេញខុសច្បាប់រាប់ពាន់លានដុង។ អ្នកទិញជាច្រើនមិនដឹងថាពួកគេកំពុងប្រើប្រាស់ផលិតផលមិនស្តង់ដារ ដែលបង្កហានិភ័យដល់សុខភាព។ ប៉ូលិសទីក្រុងហូជីមិញកំពុងបន្តពង្រីកការស៊ើបអង្កេត ដោយបានណែនាំអ្នកប្រើប្រាស់ឱ្យជ្រើសរើសគ្រឿងសម្អាងដែលមានប្រភពដើមច្បាស់លាស់ និងកុំជឿលើការផ្សាយពាណិជ្ជកម្មដែលផ្សាយថានឹងធ្វើឱ្យស្បែកសភ្លាមៗ៕