ប្រទេសអេស្ប៉ាញបានដកឯកអគ្គរដ្ឋទូតរបស់ខ្លួនប្រចាំនៅអ៊ីស្រាអែលជាអចិន្ត្រៃយ៍ នៅថ្ងៃពុធ ទី១១ ​ខែមីនា ឆ្នាំ ២០២៦ ខណៈដែលការប្រឈមមុខដាក់គ្នាផ្នែកការទូតកាន់តែអាក្រក់ទៅៗរវាងប្រទេសទាំងពីរ ជុំវិញការប្រឆាំងរបស់អេស្ប៉ាញចំពោះគោលនយោបាយអ៊ីស្រាអែល ដែលកាន់តែធ្ងន់ធ្ងរឡើងដោយការវាយប្រហាររបស់សហរដ្ឋអាមេរិក-អ៊ីស្រាអែលលើរបបអ៊ីរ៉ង់។

ឯកអគ្គរដ្ឋទូតលោកស្រី Ana Maria Salomon Perez ត្រូវបានកោះហៅឲ្យត្រឡប់ទៅកាន់ប្រទេសអេស្ប៉ាញវិញជាលើកដំបូងកាលពីខែកញ្ញាឆ្នាំមុន ។ នាយករដ្ឋមន្ត្រីអេស្ប៉ាញលោក Pedro Sanchez បានដឹកនាំការជំទាស់របស់អឺរ៉ុប ដោយអនុវត្តការហាមឃាត់ការហោះហើរពាក់ព័ន្ធនឹងអាវុធ ដែលអ៊ីស្រាអែលបានថ្កោលទោសថាជាការប្រឆាំងនឹងពួកយូដា។

កាលពីថ្ងៃអង្គារ ប្រទេសអេស្ប៉ាញបានចេញផ្សាយសេចក្តីប្រកាសមួយនៅក្នុងកាសែតផ្លូវការរបស់ខ្លួនថា តំណែងរបស់ឯកអគ្គរដ្ឋទូតត្រូវបានបញ្ចប់។ ក្រសួងការបរទេសអេស្ប៉ាញបាននិយាយថា ស្ថានទូតរបស់ខ្លួននៅទីក្រុង Tel Aviv នឹងត្រូវបានដឹកនាំដោយភារធារីនាពេលខាងមុខ។ ស្ថានទូតអ៊ីស្រាអែលប្រចាំនៅប្រទេសអេស្ប៉ាញក៏ត្រូវបានគ្រប់គ្រងដោយភារធារីផងដែរ បន្ទាប់ពីអ៊ីស្រាអែលបានកោះហៅឯកអគ្គរដ្ឋទូតរបស់ខ្លួនគឺលោកស្រី Rodica Radian-Gordon ក្នុងខែឧសភា ឆ្នាំ២០២៤ ដើម្បីតវ៉ាប្រឆាំងនឹងការសម្រេចចិត្តរបស់អេស្ប៉ាញក្នុងការទទួលស្គាល់រដ្ឋប៉ាឡេស្ទីន៕