កម្មវិធីពិព័រណ៍ការងារ ដែលរៀបចំឡើងដោយមជ្ឈមណ្ឌលសហប្រតិបត្ដិការកម្ពុជា-ជប៉ុន មានរយៈពេល ២ថ្ងៃ ចាប់ពីថ្ងៃទី៦ ដល់ថ្ងៃទី៧ ខែមីនា ឆ្នាំ២០២៦ ចាប់ពីម៉ោង ៨ព្រឹក ដល់ ៥ល្ងាច មានឱកាសការងារជាង ១៥០០កន្លែង មកពីក្រុមហ៊ុនខ្មែរ និងជប៉ុនចំនួន ៣៩ក្រុមហ៊ុន សម្រាប់ផ្តល់ជូននិស្សិត និងអ្នកកំពុងស្វែងរកការងារថ្មី ឬ អ្នកចង់ប្តូរអាជីព។

ពិព័រណ៍ការងារCJCC ជាវេទិកាការងារប្រចាំឆ្នាំ ដែលផ្តល់ឱកាសឲ្យអ្នកជ្រើសរើសបុគ្គលិកពីក្រុមហ៊ុន កម្ពុជា និងជប៉ុនមកជួបជាមួយអ្នកកំពុងស្វែងរកការងារដែលមានសក្តានុពលជាច្រើន។ សកម្មភាពពិសេសក្នុងកម្មវិធីមានដូចជា ការដាក់ស្តង់បង្ហាញរបស់ក្រុមហ៊ុន, ការធ្វើបទបង្ហាញពីក្រុមហ៊ុន, ការសម្ភាសន៍ការងារផ្ទាល់ៗ, ហ្គេមកម្សាន្ត និងសកម្មភាពសប្បាយៗ។

គួរបញ្ជាក់ផងដែរថា តាមរយៈកម្មវិធីពិព័រណ៍ការងារ នឹងជួយឲ្យអ្នកចូលរួមបានយល់ដឹងពីវិធីសាស្រ្តសំខាន់ៗក្នុងការត្រៀមខ្លួនសំរាប់ឱកាសការងារដែលស្របនឹងគោលដៅ សមត្ថភាព និងជំនាញរបស់ខ្លួន​ ក៏ដូចជាឲ្យស្របទៅតាមបរិបទការងារនាពេលបច្ចុប្បន្នផងដែរ៕