នៅក្នុងឆ្នាំ២០២៥ ចំនួនអន្ទាក់ដែលត្រូវបានដកហូតក្នុងដែនជម្រកសត្វព្រៃលំផាត់ មានការកើនឡើងគួរឱ្យកត់សម្គាល់ បើធៀបទៅនឹងឆ្នាំ២០២៤ ជាពិសេសនៅក្នុងតំបន់អភិរក្ស និងតំបន់ស្នូល។

យោងតាមអង្គការជីវិតធម្មជាតិនៅកម្ពុជា បានឱ្យដឹងថា កំណើននៃចំនួនអន្ទាក់ដែលដកហូតបាននេះ គឺឆ្លុះបញ្ចាំងពីការបង្កើននិងប្រសិទ្ធភាពនៃការចុះល្បាត និងការរៀបចំផែនការអនុវត្តច្បាប់យ៉ាងច្បាស់លាស់របស់មន្ត្រីឧទ្យានុរក្សនិងក្រុមអ្នកស្ម័គ្រចិត្តល្បាតសហគមន៍។ ជាក់ស្តែង មិនថាក្នុងរដូវវស្សា ឬរដូវប្រាំង ក្រុមល្បាតបានយកចិត្តទុកដាក់ខ្ពស់ក្នុងការឃ្លាំមើល និងទប់ស្កាត់បទល្មើសគ្រប់ប្រភេទ ដែលបង្កហានិភ័យដល់សត្វព្រៃ និងធនធានធម្មជាតិ។

តាមរយៈការលះបង់របស់មន្ត្រីឧទ្យានុរក្ស និងក្រុមអ្នកស្ម័គ្រចិត្តល្បាតសហគមន៍ ចំនួនអន្ទាក់ជាច្រើនត្រូវបានដកចេញពីក្នុងព្រៃជាបន្តបន្ទាប់។ អន្ទាក់ គឺជាកត្តាគំរាមកំហែងដ៏សាហាវបំផុតចំពោះជីវិតសត្វព្រៃ ព្រោះវាជាឧបករណ៍សម្លាប់ដោយគ្មានរើសមុខ ដែលបង្កឱ្យសត្វរងគ្រោះត្រូវដាច់ជើង ពិការភាព រហូតដល់បាត់បង់ជីវិតផងដែរ។ ការបាត់បង់សត្វព្រៃដោយសារអន្ទាក់ មិនត្រឹមតែបំផ្លាញជីវចម្រុះប៉ុណ្ណោះទេ ថែមទាំងរុញច្រានព្រៃឈើឱ្យធ្លាក់ចូលក្នុង «វិបត្តិព្រៃដែលបាត់បង់សត្វព្រៃ» និងប៉ះពាល់យ៉ាងធ្ងន់ធ្ងរដល់តុល្យភាពធម្មជាតិ ដែលគម្រោងរេដបូកដែនជម្រកសត្វព្រៃ កំពុងការពារយ៉ាងយកចិត្តទុកដាក់បំផុត។

បច្ចុប្បន្ន មន្ត្រីឧទ្យានុរក្ស និងក្រុមអ្នកស្ម័គ្រចិត្តល្បាតសហគមន៍ នៅតែបន្តបង្កើនសកម្មភាពដោះអន្ទាក់ និងពង្រឹងការអនុវត្តច្បាប់យ៉ាងម៉ឺងម៉ាត់បំផុត។ អង្គការជីវិតធម្មជាតិនៅកម្ពុជា អំពាវនាវដល់បងប្អូនប្រជាពលរដ្ឋទាំងអស់ បញ្ឈប់ការដាក់អន្ទាក់ និងបញ្ឈប់ការបរិភោគសាច់សត្វព្រៃ ដើម្បីរួមគ្នាចូលរួមការពារសត្វព្រៃនិងធនធានធម្មជាតិ សម្រាប់កូនចៅជំនាន់ក្រោយ៕