នៅថ្ងៃទី០៣ ខែមីនា ឆ្នាំ២០២៦នេះ វេលាម៉ោង១០:៥០នាទី មានករណីអគ្គិភ័យឆាបឆេះផ្ទះចំនួន ១ខ្នង យ៉ាងសន្ធោសន្ធៅ បង្កឲ្យមានការភ្ញាក់ផ្អើលខ្លាំងនៅចំណុច ស្ថិតនៅក្នុងភូមិអូតាប្រាក់ ឃុំពួក ស្រុកពួក ខេត្តសៀមរាប ដែលជនរងគ្រោះជាម្ចាស់ផ្ទះ ឈ្មោះ ជូ ពុន ភេទប្រុស អាយុ៥៧ឆ្នាំ មុខរបរ ទីប្រឹក្សាក្រសួងមហាផ្ទៃ ។

សមត្ថកិច្ចស្រុកពួកបានឲ្យដឹងថា ផ្ទះដែលរងការឆាបឆេះនេះជា ប្រភេទឈើលើ បន្ទប់ថ្មក្រោម ជញ្ជាំងក្ដារ ដំបូលប្រក់ក្បឿង ទំហំ៨ម៉ែត្រគុណ៩ម៉ែត្រ តសំយ៉ាបឈើប្រក់ក្បឿង (ផ្ទះចាស់កំពុងជួសជុលថ្មីមិនទាន់រួច រាល់) ឆេះផ្នែកខាងលើទាំងស្រុង និងខូចខាតទ្រព្យ សម្បត្តិរួមមានសម្ភារៈសាងសង់ផ្ទះ សរុបជាប្រាក់ចំនួនប្រហែល ៥០០០០(ប្រាំម៉ឺន)ដុល្លារ និងពុំមានគ្រោះថ្នាក់ដល់មនុស្សនោះទេ ។

ក្នុងប្រតិបត្តិការខាងលើនេះប្រើប្រាស់រថយន្តពន្លត់អគ្គីភ័យចំនួន០៣គ្រឿង អស់ទឹកចំនួន០៤ឡាន ប្រើប្រាស់រថយន្តពន្លត់អគ្គីភ័យរបស់ស្នងការដ្ឋាននគរបាលខេត្តចំនួន២គ្រឿង អស់ទឹកចំនួន ២ឡាន។ ប្រើប្រាស់រថយន្តពន្លត់អគ្គីភ័យរបស់អធិការដ្នាននគរបាលស្រុកពួកចំនួន ១គ្រឿង អស់ទឹកចំនួន ២ឡាន ចំពោះមូលហេតុ បណ្ដាលមកពីឆ្លងចរន្តអគ្គិសនីផងដែរ៕