អភិបាលរងខេត្ដសៀមរាប បានបន្តដឹកនាំមន្រ្ដីជំនាញ និងក្រុមការងារចម្រុះ ចុះពិនិត្យទីតាំង និងបង្ក្រាបបទល្មើសធនធានធម្មជាតិក្នុងឃុំតាសៀម និងឃុំកន្ទួត និងឃុំស្វាយលើ ក្នុងស្រុកស្វាយលើ ខេត្ដសៀមរាប កាលពីនៅថ្ងៃទី៣ ខែមីនា ឆ្នាំ២០២៦។ក្នុងឱកាសនោះ លោក អ៉ឹង គឹមលាង អភិបាលរងខេត្ដសៀមរាប បានណែនាំ និងអប់រំដល់ម្ចាស់សិប្បកម្មកែច្នៃដែលខុសច្បាប់ ក្នុងករណីដែលប្រជាពលរដ្ឋចង់បន្ដធ្វើអាជីវកម្មឡ ត្រូវធ្វើកិច្ចសន្យាព្រមព្រៀងឱ្យបានត្រឹមត្រូវតាមច្បាប់ និងបានតែឈើស្របច្បាប់តែប៉ុណ្ណេះ។ កន្លងមកអាជ្ញាធរ និងមន្រ្ដីជំនាញ បានធ្វើការចុះណែនាំ និងបញ្ឈប់មិនឱ្យមាន និងមិនឱ្យធ្វើសិប្បកម្មកែច្នៃខុសច្បាប់បន្ដទៀត ប៉ុន្តែពួកគាត់នៅបន្តធ្វើសិប្បកម្មកែច្នៃនេះដោយខុសច្បាប់។ ទន្ទឹមនឹងនោះ លោកអភិបាលរងខេត្ត ក៏បានធ្វើការណែនាំឱ្យប្រជាពលរដ្ឋងាកទៅប្រកបមុខរបរផ្សេងៗដែលស្របច្បាប់ក្នុងការចិញ្ចឹមជីវិត។ គូសបញ្ជាក់ថា មន្ត្រីជំនាញបានធ្វើការចុះពិនិត្យទីតាំង និងបង្ក្រាបបទល្មើសធនធានធម្មជាតិ ដូចជាចុះអប់រំ ណែនាំ និងធ្វើកំណត់ហេតុ រឹបអូសម៉ាស៊ីនកែច្នៃ ចុះកិច្ចសន្យាបញ្ឈប់សិប្បកម្មកែច្នៃ៣ទីតាំងក្នុងភូមិអភិវឌ្ឍន៍អូរតាកុក ឃុំកន្ទួត។ ចុះដកហូតម៉ាស៊ីនកែច្នៃ និងរឹបអូសយកឈើខុសច្បាប់ចំនួន ២ទីតាំង ស្ថិតក្នុងភូមិក្រមុំបូល ឃុំកន្ទួត។ ចុះអប់រំ និងណែនាំឱ្យពលរដ្ឋដែលនៅក្នុងភូមិត្រពាំងពពេល ឃុំតាសៀម ឱ្យបញ្ឈប់ និងបិទទីតាំងឡដុតយកធ្យូង១ទីតាំង ករណីមិនធ្វើតាម នឹងអនវុត្ដទៅតាមច្បាប់ ចុះបង្ក្រាបនឹងរឹបអូសយកម៉ាស៊ីនកែច្នៃ និងបញ្ឈប់សិប្បកម្មកែច្នៃចំនួន២ទីតាំងក្នុងភូមិជប់លើ ឃុំស្វាយលើផងដែរ៕