កីឡាផិក្កូលប៊ល (Pickleball) ត្រូវបានប្រកាសបង្កើតជាសហព័ន្ធជាតិផ្លូវការនៅកម្ពុជា ក្រោយកីឡាប្រភេទនេះ ទទួលបានការទាក់ទាញពីប្រជាពលរដ្ឋ និងយុវជនបានប្រមាណជាង ៣ពាន់នាក់ កំពុងលេងកីឡាដ៏ពេញនិយមមួយនេះ។

កីឡាផិក្កូលប៊ល (Pickleball) គឺជាកីឡាមួយប្រភេទដែលបង្កើតឡើងនៅឆ្នាំ ១៩៦៥ ដែលមានដើមកំណើតពីសហរដ្ឋអាមេរិក ខណៈបច្ចុប្បន្ន Pickleball ត្រូវបានចាត់ទុកថា ជាកីឡាដែលមានការរីកចម្រើនលឿនបំផុតមួយនៅលើពិភពលោក ដោយសារតែភាពងាយស្រួលលេង ការចំណាយទាប និងអត្ថប្រយោជន៍សុខភាព។

យ៉ាងណាមិញ នៅក្នុងពិធីប្រកាសដំណើរការសហព័ន្ធកីឡាផិក្កូលប៊លកម្ពុជា ធ្វើឡើងនាល្ងាចថ្ងៃទី២៩ ខែមករា ឆ្នាំ២០២៦ ក្រោមវត្តមាន ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ព្រមទាំងសមាជិកគណៈកម្មាធិការប្រតិបត្តិសហព័ន្ធ អាណត្តិទី១ ឆ្នាំ២០២៦-២០៣០ ចំនួន ២៣រូប ដោយមានលោក លឹម ហ៊ួរនីតា ជាប្រធានសហព័ន្ធ។

ឯកឧត្តម វ៉ាត់ ចំរើន បានសម្ដែងការអបអរសាទរ ចំពោះវត្តមានកីឡាកូនពៅថ្មីមួយទៀតលើទឹកដីកម្ពុជា ក្រោមម្លប់នៃសន្ដិភាព ដើម្បីបង្កឱកាសកាន់តែសម្បូរបែបសម្រាប់ប្រជាពលរដ្ឋក្នុងការលេងកីឡា។ យ៉ាងណាក្ដី ក្នុងនាមសហព័ន្ធថ្មី លោកបានចែករំលែកនូវបេសកកម្មសំខាន់ៗពីរ ដែលសហព័ន្ធត្រូវប្រកាន់ភ្ជាប់ ទី១-ការជំរុញកីឡាផិក្កូលប៊ល ឲ្យក្លាយជាកីឡាមានប្រជាប្រិយភាពក្នុងសង្គម និង ទី២-ការពង្រឹង និងអភិវឌ្ឍន៍ជំនាញបច្ចេកទេសកីឡាផិក្កូលប៊លកម្ពុជាឲ្យឈានទៅរកសក្ដានុពលនៃគុណផលកីឡា ទាំងក្នុង និងក្រៅប្រទេស។

លោក លឹម ហ៊ួរនីតា បានបង្ហាញការប្ដេជ្ញាចិត្ត ក៏ដូចជាការត្រៀមខ្លួនរួចជាស្រេច ដើម្បីដឹកនាំ និងជំរុញការអភិវឌ្ឍកីឡាផិក្កូលប៊លកម្ពុជា ឆ្ពោះទៅរកការប្រកួតប្រជែងលើឆាកអន្ដរជាតិ ដ្បិតបច្ចុប្បន្នសហព័ន្ធមានធនធានកីឡាករ-កីឡាការិនីកំពុងហ្វឹកហាត់កីឡានេះជាង ៣ពាន់នាក់ និងមានខេត្តចំនួន ៦ ដែលមានក្លិបកីឡាផិក្កូលប៊ល រួមជាមួយបណ្ដាក្លិបជាច្រើន នៅរាជធានីភ្នំពេញ ក្រោយមានវត្តមានកីឡានេះនៅកម្ពុជា ១ឆ្នាំកន្លងមក ហើយសហព័ន្ធនឹងបន្ដរៀបចំរចនាសម្ព័ន្ធ និងពង្រីកក្លិបឲ្យកាន់តែច្រើនបន្ថែមទៀត។

ប្រធានសហព័ន្ធរូបនេះ បានលើកឡើងយ៉ាងដូច្នេះថា៖ «ពាក់ព័ន្ធនឹងផែនការចូលរួមការប្រកួតជាតិ និងអន្ដរជាតិនានា ពួកយើងបានរៀបចំពីមុនមកហើយ តាមរយៈការប្រកួតជុំគ្នាម្ដងៗ យើងបានសង្កេតកីឡាករ អ្នកណាចូលចិត្តលេងបែបសុខភាព អ្នកណាចូលចិត្តប្រកួតប្រជែងកម្រិតខ្ពស់ ដែលយើងឃើញមានច្រើន”។ 

គួរដឹងថា សម្រាប់សមាជិកគណៈកម្មាធិការប្រតិបត្តិសហព័ន្ធកីឡាផិក្កូលប៊លកម្ពុជា អាណត្តិទី១ នេះ មាន ២៣រូប ដែលដឹកនាំដោយលោក លឹម ហ៊ួរនីតា ជាប្រធាន និងលោក ប៊ុន សុខ ជាអនុប្រធានទី១ ព្រមទាំងអនុប្រធាន, អគ្គលេខាធិការ និងអគ្គលេខាធិការរង, អគ្គហេរញ្ញិក និងអគ្គហេរញ្ញិករង ព្រមទាំងសមាជិកសរុប ២១រូបផ្សេងទៀត។ លើសពីនេះ សហព័ន្ធក៏មានលោកឧបនាយករដ្ឋមន្ដ្រី សុខ ចិន្ដាសោភា ជាប្រធានកិត្តិយសផងដែរ៕