សម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី០៤ ខែមីនា ឆ្នាំ២០២៦នេះ បានអញ្ជើញជាអធិបតីបើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ ដែលជាវេទិកាមួយឆ្លុះបញ្ចាំងពីភាពជាដៃគូដ៏រឹងមាំ និងយូរអង្វែងរវាងសភាពាណិជ្ជកម្មកម្ពុជា អាស៊ាន-BAC កម្ពុជា និងដៃគូរបស់យើងនៅទូទាំងសភាពាណិជ្ជកម្មអន្តរជាតិ និងសមាគមធុរកិច្ច។ 

ការរៀបចំកិច្ចប្រជុំកំពូលនេះ នៅដំណាក់កាលដ៏សំខាន់មួយសម្រាប់សេដ្ឋកិច្ចពិភពលោក ក្នុងសម័យកាលនៃការប្រកួតប្រជែងជាយុទ្ធសាស្ត្រកាន់តែខ្លាំង រវាងមហាអំណាចធំៗ ដែលអាស៊ានកំពុងតែធ្វើដំ ណើរ ឆ្លងកាត់រលកសម្ពាធ ដែលកើតចេញពីភាពតានតឹងរវាងសហរដ្ឋអាមេរិក និងចិន។

កិច្ចប្រជុំកំពូលនេះ ត្រូវបានរៀបចំឡើងដោយផ្អែកលើមរតកដ៏មានមោទនភាពរបស់កម្ពុជា ក្នុងនាមជាម្ចាស់ផ្ទះនៃកិច្ចប្រជុំកំពូលអាស៊ានក្នុងឆ្នាំ ២០០២, ២០១២ និង ២០២២។ ទោះជាយ៉ាងនេះក្ដី ព្រឹត្តិការណ៍ថ្ងៃនេះមិនត្រឹមតែជាការឆ្លុះបញ្ចាំងពីសមិទ្ធផលកន្លងមកប៉ុណ្ណោះទេ ប៉ុន្តែក៏ជាការសម្លឹងមើលទៅអនាគតផងដែរ។

ប្រធានបទ“បរិវត្តកម្មអាស៊ាន៖ នវានុវត្តន៍ សមាហរណកម្ម និងការវិវត្តន៍ឧស្សាហកម្ម” ចាប់យកនូវភាពចាំបាច់នេះ។ នៅឆ្នាំ ២០២៦ ភាពធន់តែមួយមុខលែងគ្រប់គ្រាន់ទៀតហើយ។ អាស៊ានត្រូវតែវិវត្តន៍ដើម្បីឆ្លើយតបទៅនឹងកម្លាំងដែលកំពុងបង្រួបបង្រួមយ៉ាងឆាប់រហ័ស ហើយដែលកំពុងផ្លាស់ប្តូរទិដ្ឋភាពសេដ្ឋកិច្ចសកល។ ១. នវានុវត្តន៍ឌីជីថលកំពុងពន្លឿនបរិវត្តកម្មក្នុងតំបន់។ ឆ្នាំនេះគឺជាការចុះហត្ថលេខាជាប្រវត្តិសាស្ត្រនៃកិច្ចព្រមព្រៀងក្របខ័ណ្ឌសេដ្ឋកិច្ចឌីជីថលអាស៊ាន ឬ DEFA ដែលជាកិច្ចព្រមព្រៀងឌីជីថលទូទាំងតំបន់ដំបូងគេរបស់ពិភពលោក ហើយដែលត្រូវបានរំពឹងថា នឹងបង្កើនសេដ្ឋកិច្ចឌីជីថលរបស់អាស៊ានទ្វេដងដល់ ២ ទ្រីលានដុល្លារអាមេរិកនៅឆ្នាំ ២០៣០។

២. ការធ្វើសមាហរណកម្មសេដ្ឋកិច្ចកាន់តែស៊ីជម្រៅកំពុងក្លាយជាទិដ្ឋភាពជាក់ស្តែង និងកំពុងដំណើរការ។តាមរយៈភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ អាស៊ានបានផ្លាស់ប្តូរលើសពីការប្តេជ្ញាចិត្តដែលមាននៅលើក្រដាស ឆ្ពោះទៅរកការធ្វើសមកាលកម្មតំបន់ពិតប្រាកដនៃខ្សែសង្វាក់ផ្គត់ផ្គង់ជាមួយដៃគូរបស់យើងនៅក្នុងប្រទេសចិន ជប៉ុន សាធារណរដ្ឋកូរ៉េ អូស្ត្រាលី និងនូវែលសេឡង់។ និង៣. ការផ្លាស់ប្តូរបៃតងកំពុងទទួលបានសន្ទុះ។ ការភ្ជាប់ទំនាក់ទំនងថាមពលក្នុងតំបន់កំពុងលេចចេញជារូប រាង ដែលអនុញ្ញាតឱ្យថាមពលកកើតឡើងវិញឆ្លងកាត់ព្រំដែន និងផ្តល់ថាមពលដល់មជ្ឈមណ្ឌលឧ ស្សា ហកម្មពីអនុតំបន់មេគង្គរហូតដល់សមុទ្រជ្វា ខណៈពេលដែលគាំទ្រដល់កំណើនប្រកបដោយចីរភាព និងបរិយាប័ន្ន៕