បេក្ខជនតំណាងរាស្រ្តគណបក្សប្រជាជនម្នាក់សម្រាប់មណ្ឌលបោះឆ្នោតលេខ ២ នៃខេត្តតាក ប្រទេសថៃត្រូវបានចោទប្រកាន់ពីបទដើរតួជាអ្នកទទួលផលចុងក្រោយនៃបណ្តាញល្បែងស៊ីសងតាមអ៊ីនធឺណែត បន្ទាប់ពីការចាប់ខ្លួនដោយការិយាល័យស៊ើបអង្កេតឧក្រិដ្ឋកម្មតាមអ៊ីនធឺណែត (CCIB) ពីបទជាប់ពាក់ព័ន្ធនឹងល្បែងស៊ីសងខុសច្បាប់ និងការលាងលុយកខ្វក់។ប៉ូលិសបាននិយាយថា លោក Ratchapong Soisuwan អាយុ ៣២ ឆ្នាំ ត្រូវបានចាប់ខ្លួននៅផ្ទះរបស់លោកនៅទីក្រុងបាងកកនៅម៉ោង ៥៖២០ ល្ងាច ថ្ងៃទី១៤ ខែមករា ក្រោមដីកាចាប់ខ្លួនរបស់តុលាការ។ យោងតាម ​​CCIB ការស៊ើបអង្កេតបានកំណត់អត្តសញ្ញាណគណនីធនាគារជាច្រើនដែលត្រូវបានប្រើដើម្បីទទួល និងផ្ទេរប្រាក់ចំណូលពីល្បែងស៊ីសង មុនពេលប្រាក់ត្រូវបានផ្ទេរទៅគណនីរបស់លោក Ratchapong។ ដីកាចាប់ខ្លួនត្រូវបានចេញសម្រាប់ជនសង្ស័យចំនួន ០៦នាក់ដែលមានទំនាក់ទំនងជាមួយបណ្តាញនេះ ដោយមាន០៤នាក់ត្រូវបានចាប់ខ្លួន និង ០២នាក់ទៀតកំពុងរត់គេចខ្លួន។

បន្ទាប់ពីការចាប់ខ្លួន លោក Ratchapong Soisuwan គណបក្សប្រជាជនបានចេញសេចក្តីថ្លែងការណ៍មួយដោយនិយាយថា ខ្លួននឹងមិនការពារ ឬលាក់បាំងអំពើខុសឆ្គងរបស់សមាជិកណាមួយរបស់ខ្លួនឡើយ ហើយថាជនជាប់ចោទទាំងនោះត្រូវតែប្រឈមមុខនឹងដំណើរការផ្លូវច្បាប់៕