រដ្ឋសភា បានសហការជាមួយអង្គការ People for Care and Learning (PCL) ចុះបេសកកម្មមនុស្សធម៌ ដើម្បីផ្តល់ជំនួយមនុស្សធម៌ និងលើកទឹកចិត្តដល់ពលរដ្ឋភៀសសឹកដែលកំពុងជួបការលំបាក។ បេសកម្មនេះត្រូវបានដឹកនាំដោយ ឯកឧត្តម កែប ជុតិមា ប្រធានគណៈកម្មការទី៤ នៃរដ្ឋសភា និងលោកជំទាវ។បេសកកម្មមនុស្សធម៌រួមគ្នានេះ ធ្វើឡើងក្រោមការចង្អុលបង្ហាញ និងការអនុញ្ញាតដ៏ខ្ពង់ខ្ពស់ពី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដើម្បីឆ្លើយតបទៅនឹងតម្រូវការចាំបាច់ជាក់ស្តែងរបស់បងប្អូនប្រជាពលរដ្ឋចំនួន ៤១៤ គ្រួសារ (ស្មើនឹង ១,៣៩៥ នាក់) ដែលកំពុងស្នាក់នៅបណ្តោះអាសន្នក្នុងមណ្ឌលសុវត្ថិភាពវត្តធម្មរង្សី ស្ថិតក្នុងស្រុកក្រឡាញ់ ខេត្តសៀមរាប បន្ទាប់ពីលំនៅឋានរបស់ពួកគាត់រងការគំរាមកំហែង និងខូចខាតពីការរំលោភបំពានលើបូរណភាពទឹកដីពីសំណាក់ភាគីថៃ។

តាមរយៈកិច្ចសហការយ៉ាងស្អិតរមួតជាមួយលោក Travis Johnson Christian នាយកប្រតិបត្តិអង្គការ PCL ជំនួយមនុស្សធម៌ជាច្រើនសន្ធឹកសន្ធាប់ រួមមានស្បៀងអាហារ គ្រឿងឧបភោគបរិភោគចាំបាច់ និងថវិកាឧបត្ថម្ភ ត្រូវបានចាត់ចែងចែកចាយដល់ដៃគ្រួសារនីមួយៗ ដើម្បីសម្រាលបន្ទុកជីវភាពប្រចាំថ្ងៃ។ បន្ថែមពីនេះ ឯកឧត្តមក៏បានផ្តល់ការឧបត្ថម្ភ និងការគាំទ្រយ៉ាងសកម្មដល់កងកម្លាំងការពារព្រំដែន ក្រុមគ្រូពេទ្យ និងអាជ្ញាធរមូលដ្ឋាន ដែលកំពុងបំពេញភារកិច្ចការពារ និងថែទាំពលរដ្ឋយ៉ាងយកចិត្តទុកដាក់បំផុត។

បច្ចុប្បន្នអាជ្ញាធរពាក់ព័ន្ធ និងកងកម្លាំងសមត្ថកិច្ច កំពុងបន្តតាមដានស្ថានភាពយ៉ាងហ្មត់ចត់ ដើម្បីធានាថាពលរដ្ឋភៀសសឹកទាំងអស់ ទទួលបាននូវការគាំទ្រទាំងស្មារតី និងសម្ភារៈ រហូតដល់ស្ថានភាពមានសុវត្ថិភាពពេញលេញ ដែលអាចឱ្យពួកគាត់វិលត្រឡប់ទៅកាន់លំនៅឋាន និងប្រកបរបរចិញ្ចឹមជីវិតជាប្រក្រតីឡើងវិញ៕