(ខេត្តព្រះវិហារ) ចាប់ពីថ្ងៃទី១៣ ដល់ថ្ងៃទី១៥ ខែមករា ឆ្នាំ២០២៦ អង្គការទឹកភ្លៀងកម្ពុជា បានសហការជាមួយមន្ទីរអប់រំ យុវជន និងកីឡាខេត្តព្រះវិហារ រៀបចំវគ្គបំប៉នគ្រូបង្គោលស្តីពី «សុខភាព និងអនាម័យពេលមករដូវ ភាពពេញវ័យ និងការអប់រំផ្លូវភេទ» ក្នុងគោលបំណងលើកកម្ពស់សុខុមាលភាព ការយល់ដឹង និងសិទ្ធិរបស់ក្មេងស្រីវ័យជំទង់នៅតាមសាលារៀន។

វគ្គបណ្តុះបណ្តាលនេះ ត្រូវបានរៀបចំឡើងក្រោមការឧបត្ថម្ភថវិកាពីរដ្ឋាភិបាលអាល្លឺម៉ង់ (Engagement Global/BMZ) តាមរយៈអង្គការ KHA និងមានការសម្របសម្រួលបច្ចេកទេសពីនាយកដ្ឋានសុខភាពសិក្សា នៃក្រសួងអប់រំ យុវជន និងកីឡា ដើម្បីធានាថាមាតិកាបណ្តុះបណ្តាលស្របតាមគោលនយោបាយជាតិ និងស្តង់ដារអប់រំសុខភាព។

សិក្ខាកាមចូលរួមសរុបមានចំនួន ២២នាក់ (ស្រី ៨នាក់) រួមមាន អភិបាលរងនៃគណៈអភិបាលស្រុក មន្ត្រីការិយាល័យសុខភាពសិក្សានៃមន្ទីរអប់រំខេត្ត មន្ត្រីការិយាល័យអប់រំ យុវជន និងកីឡានៃស្រុកគោលដៅក្នុងខេត្តព្រះវិហារ និងមន្ត្រីគម្រោងអង្គការទឹកភ្លៀងកម្ពុជា។

យ៉ាងណាមិញក្នុងវគ្គបណ្តុះបណ្តាលនេះ សិក្ខាកាមត្រូវបានផ្តល់ចំណេះដឹងទ្រឹស្តី និងការអនុវត្តជាក់ស្តែង ពាក់ព័ន្ធនឹង៖ 

- ការគ្រប់គ្រងអនាម័យពេលមករដូវនៅតាមសាលារៀន

- ការយល់ដឹងអំពីភាពពេញវ័យ និងការប្រែប្រួលរាងកាយ-ផ្លូវចិត្ត

- សុខភាពបន្តពូជ និងសុខភាពផ្លូវភេទ

- វិធីសាស្ត្របង្រៀន និងផ្សព្វផ្សាយចំណេះដឹងដល់សិស្សស្រី និងសិស្សប្រុស ដោយគ្មានការរើសអើង និងគោរពសិទ្ធិកុមារ

ជាមួយគ្នានេះ គោលបំណងសំខាន់ៗនៃវគ្គនេះ គឺការលើកកម្ពស់ការគ្រប់គ្រងអនាម័យពេលមករដូវឱ្យមានសុវត្ថិភាព សម្ងាត់ និងមានគុណភាពនៅតាមសាលារៀន ព្រមទាំងបង្កើនការយល់ដឹងអំពីសិទ្ធិក្មេងស្រីវ័យជំទង់ ការការពារខ្លួនពីហានិភ័យផ្លូវភេទ និងការថែរក្សាសុខភាពបន្តពូជ។ ជាមួយគ្នានេះ ក៏បានផ្តោតលើការគ្រប់គ្រងសំណល់អនាម័យដោយគិតគូរពីបរិស្ថាន និងសុខភាពសហគមន៍ផងដែរ។

លោកស្រី ជៃ រស្មី ប្រធានគម្រោងនៃអង្គការទឹកភ្លៀងកម្ពុជា បានបញ្ជាក់ថា វគ្គបំប៉នគ្រូបង្គោលនេះ ជាជំហានសំខាន់មួយក្នុងការបង្កើតបណ្តាញគ្រូបង្គោលនៅមូលដ្ឋាន ដែលអាចបន្តផ្សព្វផ្សាយចំណេះដឹងទៅកាន់គ្រូ និងសិស្សនៅតាមសាលារៀន ដើម្បីធានាថាក្មេងស្រីអាចបន្តការសិក្សាបានដោយគ្មានការរាំងស្ទះដោយសារបញ្ហាអនាម័យពេលមករដូវ។

លោកស្រី បានបន្ថែមថា វគ្គបណ្តុះបណ្តាលនេះ ត្រូវបានរំពឹងថានឹងរួមចំណែកយ៉ាងសំខាន់ក្នុងការកែលម្អបរិយាកាសសាលារៀនឱ្យកាន់តែមានសុវត្ថិភាព មិត្តភាព និងគាំទ្រដល់សិស្សស្រី និងយុវជនទូទៅ ក្នុងខេត្តព្រះវិហារ៕