ក្រុមហ៊ុន Nestle បានចេញការប្រមូលផលិតផលម្សៅទឹកដោះគោទារកមួយចំនួនទូទាំងពិភពលោក ដោយសារការព្រួយបារម្ភថា ពួកវាមានផ្ទុកជាតិពុលដែលអាចបណ្តាលឱ្យពុលអាហារ។

ក្រុមហ៊ុនអាហារ និងភេសជ្ជៈយក្សនេះ បាននិយាយថា ម្សៅទឹកដោះគោទារក SMA និងម្សៅទឹកដោះគោបន្តរបស់ខ្លួនមួយចំនួនជាក់លាក់មិនមានសុវត្ថិភាពក្នុងការផ្តល់ឲ្យទារកនោះទេ។ ម្សៅទឹកដោះគោទាំងនេះត្រូវបានលក់ទូទាំងពិភពលោក ហើយពួកវាអាចមានផ្ទុកសារធាតុ Cereulide ដែលអាចបង្កឱ្យមានការចង្អោរ និងក្អួតនៅពេលទទួលទាន។

ក្រុមហ៊ុន Nestle បាននិយាយថា មិនមានរបាយការណ៍ណាមួយដែលបានបញ្ជាក់អំពីជំងឺដែលទាក់ទងនឹងផលិតផលនោះទេ ប៉ុន្តែកំពុងប្រមូលវាមកវិញ ដោយសារតែការប្រុងប្រយ័ត្នខ្ពស់ ហើយថា «សុវត្ថិភាព និងសុខុមាលភាពរបស់ទារកគឺជាអាទិភាពចម្បងរបស់យើង យើងសូមអភ័យទោសយ៉ាងស្មោះស្ម័គ្រចំពោះការព្រួយបារម្ភ ឬការរអាក់រអួលណាមួយដែលបង្កឡើងចំពោះឪពុកម្តាយ អ្នកថែទាំ និងអតិថិជន»។

ការប្រមូលមកវិញនេះគឺជាសកល ខណៈផលិតផលដែលរងផលប៉ះពាល់ត្រូវបានលក់នៅក្នុងប្រទេសជាច្រើននៅអឺរ៉ុប រួមទាំងប្រទេសបារាំង អាល្លឺម៉ង់ អូទ្រីស ដាណឺម៉ាក អ៊ីតាលី និងស៊ុយអែត។

សារធាតុ Cereulide គឺជាជាតិពុលដែលផលិតដោយបាក់តេរី Bacillus cereus មួយចំនួនដែលអាចបង្កឱ្យមានរោគសញ្ញាពុលអាហារ ដែលអាចវិវត្តយ៉ាងឆាប់រហ័ស និងរួមមានការក្អួត និងឈឺពោះ ដែលមិនទំនងជាត្រូវបានធ្វើឱ្យអសកម្ម ឬបំផ្លាញដោយការចម្អិនអាហារ ការប្រើទឹកពុះ ឬនៅពេលធ្វើទឹកដោះគោទារកនោះទេ នេះបើយោងតាមទីភ្នាក់ងារស្តង់ដារអាហារ (FSA)។

លោកស្រី Jane Rawling ប្រធានផ្នែកឧប្បត្តិហេតុរបស់ FSA បាននិយាយថា ឪពុកម្តាយ អាណាព្យាបាល និងអ្នកថែទាំមិនគួរផ្តល់អាហារដល់ទារក ឬកុមារតូចៗនូវផលិតផលដែលរងផលប៉ះពាល់នោះទេ៕