ប្រទេសម៉ាឡេស៊ីនឹងធ្វើជាម្ចាស់ផ្ទះនៃកិច្ចប្រជុំរដ្ឋមន្ត្រីអាស៊ានពិសេសមួយនៅថ្ងៃទី ២២ ខែធ្នូខាងមុខ ដោយរដ្ឋមន្ត្រីការបរទេសថៃនឹងចូលរួមដើម្បីពិភាក្សាអំពីជម្លោះព្រំដែនរវាងកម្ពុជា និងថៃដោយផ្ទាល់។

អ្នកនាំពាក្យក្រសួងការបរទេសថៃ លោក Nikorndej Balankura បានបញ្ជាក់ក្នុងសន្និសីទសារព័ត៌មាននៅថ្ងៃទី ១៥ ខែធ្នូម្សិលមិញនេះថា រាជរដ្ឋាភិបាលថៃបានដាក់ចេញនូវលក្ខខណ្ឌសំខាន់ៗចំនួន០៣ សម្រាប់កម្ពុជាដើម្បីធ្វើបទឈប់បាញ់ ចំពេលមានភាពតានតឹងតាមព្រំដែនដែលកំពុងបន្ត។

លក្ខខណ្ឌទាំងនោះរួមមាន ១. កម្ពុជាត្រូវតែប្រកាសបទឈប់បាញ់មុន ក្នុងនាមជាភាគីដែលបានចូលទឹកដីថៃ ២. បទឈប់បាញ់ត្រូវតែធ្វើឡើងដោយការអនុវត្តជាក់ស្តែង និងស្ថិតស្ថេរ ដោយមិនវិលត្រឡប់ទៅរកអំពើហិង្សាឡើយ និង ៣. កម្ពុជាត្រូវតែសហការក្នុងការសម្អាតមីនក្រោមអនុសញ្ញាអូតាវ៉ា៕