បញ្ជាការភាគខាងត្បូងសហរដ្ឋអាមេរិកបាននិយាយកាលពីថ្ងៃច័ន្ទ (ថ្ងៃទី ១៥ ខែធ្នូ) ថា ខ្លួនបានធ្វើការវាយប្រហារលើនាវាចំនួន ០៣គ្រឿងនៅក្នុងដែនទឹកអន្តរជាតិ ដោយបានសម្លាប់បុរសចំនួន០៨នាក់។យោធាបាននិយាយនៅក្នុងសារមួយនៅលើ X ថា ស៊ើបការណ៍សម្ងាត់បានបញ្ជាក់ថា នាវាទាំងនោះកំពុងធ្វើដំណើរតាមបណ្តោយផ្លូវជួញដូរគ្រឿងញៀនដែលគេស្គាល់នៅភាគខាងកើតប៉ាស៊ីហ្វិក ហើយបានចូលរួមក្នុងសកម្មភាពជួញដូរគ្រឿងញៀន។ សហរដ្ឋអាមេរិកបានវាយប្រហារនាវាជាង ២០ គ្រឿងនៅមហាសមុទ្រប៉ាស៊ីហ្វិក និងសមុទ្រការ៉ាប៊ីនក្បែរប្រទេសវេណេស៊ុយអេឡា ដែលជាផ្នែកមួយនៃយុទ្ធនាការយោធាដែលប្រធានាធិបតី Donald Trump បានចាប់ផ្តើមលើការរត់ពន្ធគ្រឿងញៀនពីតំបន់នេះ។យ៉ាងហោចណាស់មានជនសង្ស័យរត់ពន្ធគ្រឿងញៀនចំនួន ៩០ នាក់ត្រូវបានសម្លាប់នៅក្នុងដំណើរការនេះ។ រដ្ឋបាលលោក Trump បានព្យាយាមការពារភាពស្របច្បាប់នៃការវាយប្រហារ ដែលអ្នកជំនាញផ្នែកច្បាប់មួយចំនួនបាននិយាយថា គឺជាការសម្លាប់ក្រៅប្រព័ន្ធតុលាការខុសច្បាប់។ ការវាយប្រហារទាំងនេះត្រូវបានគេមើលឃើញថាជាការត្រៀមលក្ខណៈសម្រាប់ការវាយប្រហារតាមផ្លូវគោករបស់សហរដ្ឋអាមេរិកលើប្រទេសវេណេស៊ុយអេឡា ដែលលោក Trump បាននិយាយថានឹងចាប់ផ្តើមក្នុងពេលឆាប់ៗនេះ៕