កងទ័ពអាកាសភូមិន្ទថៃ (RTAF) បានបញ្ជាក់ថា យន្តហោះ F-16 ត្រូវបានដាក់ពង្រាយដើម្បីវាយប្រហារគោលដៅយោធាកម្ពុជា បន្ទាប់ពីចារកម្មបានបង្ហាញពីចលនាអាវុធធុនធ្ងន់ និងកងកម្លាំងប្រយុទ្ធ ដែលអាចបង្កើនប្រតិបត្តិការ និងបង្កការគំរាមកំហែងសន្តិសុខ ខណៈអ្នកនាំពាក្យកម្ពុជាបានបញ្ជាក់ថាកម្ពុជាមិនមានការបាញ់តបតនោះទេ។

អ្នកនាំពាក្យកងទ័ពអាកាស ឧត្តមសេនីយ៍ Chakkris Thammavichai ថា ប្រតិបត្តិការនេះត្រូវបានធ្វើឡើងដោយសម្របសម្រួលជាមួយកងកម្លាំង Suranaree ដើម្បីឆ្លើយតបទៅនឹងសកម្មភាពយោធាកម្ពុជា ដែលគំរាមកំហែងដោយផ្ទាល់ដល់សន្តិសុខរបស់ប្រទេសថៃ និងសុវត្ថិភាពរបស់ជនស៊ីវិលដែលរស់នៅតាមតំបន់ព្រំដែន ក៏ដូចជាបុគ្គលិកថៃដែលកំពុងប្រតិបត្តិការនៅក្នុងតំបន់ទាំងនោះ។

លោកបាននិយាយថា ចារកម្មប្រតិបត្តិការបានបង្ហាញពីការផ្លាស់ប្តូរទីតាំងឧបករណ៍ធុនធ្ងន់ ការដាក់ពង្រាយកងទ័ព និងការរៀបចំការគាំទ្រការបាញ់ប្រហាររបស់កម្ពុជា ដែលអាចពង្រីកសកម្មភាពយោធា និងគំរាមកំហែងដល់ស្ថិរភាពព្រំដែន។

យ៉ាងណាមិញ អ្នកនាំពាក្យក្រសួងការពារជាតិកម្ពុជាបញ្ជាក់ថា យោធាថៃបានធ្វើសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយ ក្នុងចេតនាញុះញង់ដើម្បីនាំដល់ការប៉ះទង្គិចគ្នា។ ដោយឈរលើស្មារតីនៃការគោរពរាល់កិច្ចព្រមព្រៀងដែលបានឯកភាពគ្នា និងការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ នៅក្នុងឧប្បត្តិហេតុលើកទីពីរនោះ កងកម្លាំងកម្ពុជាក៏មិនបានធ្វើការបាញ់តបតឡើយ និងកំពុងបន្តតាមដានលើការវិវត្តនេះយ៉ាងប្រុងប្រយ័ត្ន និងយកចិត្តទុកដាក់ខ្ពស់បំផុត។

ជាមួយគ្នានេះ សម្តេចតេជោ ហ៊ុន សែន នៅព្រឹកថ្ងៃទី ៨ ខែធ្នូនេះបានចេញសារបញ្ជាយ៉ាងម៉ឺងម៉ាត់ទៅកាន់កងកម្លាំងប្រដាប់អាវុធជួរមុខទាំងអស់ឲ្យមានការអត់ធ្មត់ខ្ពស់បំផុត ខណៈដែលក្រុមឈ្លានពានកំពុងបាញ់ប្រហារគ្រប់ប្រភេទមកលើកងកម្លាំងកម្ពុជា តាំងពីម្សិលមិញ យប់មិញ និងព្រឹកនេះ គឺដើម្បីទាញកម្ពុជាឲ្យធ្វើការតបតវិញ ក្នុងគោលដៅបំផ្លាញចោលទាំងស្រុងនូវ បទឈប់បាញ់ និង សេចក្តីថ្លែងការណ៍សន្តិភាពកម្ពុជា-ថៃ។

ទន្ទឹមនោះ សារព័ត៌មានអន្តរជាតិធំៗលើពិភពលោកក៏បានចុះផ្សាយផងដែរថា «ថៃ ប្រើយន្តហោះ F-16 វាយប្រហារមកលើទឹកដីកម្ពុជា»៕