បើយោងតាមសេចក្តីថ្លែងការណ៍ របស់ក្លឹបព្រះខ័នរាជស្វាយរៀង បានបញ្ជាក់កាលពីព្រឹកមិញថា នៅចុងបញ្ចប់នៃរដូវកាលនេះ លោក Pep Muñoz នឹងចាកចេញពីតួនាទីជាគ្រូបង្វឹក ព្រះខ័នរាជស្វាយរៀង ខណៈក្រោមការដឹកនាំលោក Pep Muñoz ក្លិបបានសម្រេចនូវសមិទ្ធផលក្នុងព្រឹត្តិការណ៍សំខាន់ៗ និងទទួលបានភាពជោគជ័យដែលមិនធ្លាប់មានពីមុនមកក្នុងការប្រកួតទាំងក្នុង និងក្រៅប្រទេស។

យ៉ាងណាមិញ គ្រប់គ្នានៅព្រះខ័នរាជស្វាយរៀង បានថ្លែងនូវការដឹងអំណរគុណយ៉ាងស្មោះស្ម័គ្រចំពោះ Pep សម្រាប់ការចូលរួមដឹកនាំ រៀបចំដ៏ប៉ិនប្រសប់របស់គាត់ ហើយយើងសូមជូនពរគាត់ឱ្យទទួលបានជោគជ័យក្នុងជំហ៊ានបន្ទាប់នៃអាជីពគ្រូបង្វឹករបស់លោក។

លោក Pep Muñoz ត្រូវបានតែងតាំងជាគ្រូបង្វឹកក្លិបព្រះខ័នរាជស្វាយរៀង កាលពីថ្ងៃទី៦ ខែឧសភា ឆ្នាំ២០២៣ ដែលគិតត្រឹមពេលនេះលោកបានដឹកនាំក្លិបឈ្នះជើងឯកលីគកំពូលកម្ពុជា២រដូវកាលជាប់គ្នា ឈ្នះជើងឯកពានរង្វាន់សម្តេចតេជោ ហ៊ុន សែន ឈ្នះជើងឯកខេមបូឌានស៊ុបភើខាប់ និងជើងឯករងពានរង្វាន់អាស៊ី AFC Challenge League ។ ជាមួយគ្នានេះ លោកបានដឹកនាំព្រះខ័នរាជស្វាយរៀង ឈានដល់វគ្គផ្តាច់ព្រ័ត្រ ដែលត្រូវប្រកួតនៅថ្ងៃទី២៥ ខែឧសភានេះទៀត។

លោក Pep អាយុ៤៥ឆ្នាំ គឺជាគ្រូបង្វឹកសញ្ជាតិអេស្ប៉ាញដែលកាន់អាជ្ញាប័ណ្ណកម្រិតយូហ្វាប្រូឡាយសិន ជាមួយនឹងបទពិសោធន៍ជាបង្វឹកជាង១៩ឆ្នាំ។ លោកបានចាប់ផ្តើមអាជីពជាគ្រូបង្វឹកដំបូងនៅក្រុម UE Lleida ក្នុងប្រទេសអេស្ប៉ាញមុនទៅចូលរួមជាមួយក្លិបយក្ស FC Barcelona។

គួរបញ្ជាក់ថា លោក Pep Muñoz នឹងទទួលបន្ទុកដឹកនាំការប្រកួតចុងក្រោយរបស់ខ្លួនសម្រាប់ក្លិបក្នុងវគ្គផ្តាច់ព្រ័ត្រ ពានរង្វាន់ សម្តេចអគ្គមហាសេនាបតីតេជោ ហ៊ុន សែន នៅចុងសប្តាហ៍នេះ ហើយអាចចាត់ទុកថា នាជាការប្រកួតសម្រាប់លោកដែលត្រូវលាក្រុមព្រះខ័នរាជស្វាយរៀងផងដែរ៕