ដំណើរ​ទស្សនកិច្ច​​សិក្សា​រៀនសូត្រដកស្រង់ បទពិសោធន៍​ជាក់ស្តែងពីភាគីមិត្តចិនក្នុងការអភិវឌ្ឍបច្ចេកវិទ្យាទំនើប ដោយ​ផ្តោតលើការបន្ថែមតម្លៃនៃការ​កែច្នៃផលិតផល ការនាំចេញ​ផលិតផល​កសិកម្ម​ទៅកាន់​ប្រទេស​ចិន​និងតួនាទីរបស់ស្ថាប័នពាក់ព័ន្ធនិងអាជ្ញាធរ ក្នុងការ ជំរុញការវិនិយោគនិងពាណិជ្ជកម្ម បានសម្រេចទៅប្រកបដោយផ្លែផ្កា ដឹកនាំ​ដោយ​លោក​ជំទាវ​ ​ខាឡេង ​រដ្ឋលេខាធិការ​ក្រសួង​ពាណិជ្ជ​កម្ម​ ទៅបំពេញ ទស្សនកិច្ច​នៅទីក្រុង ឆុងឈីង​ និងទីក្រុងគុនមីង​(ខេត្ត​យូ​ណាន)​សាធារណរដ្ឋ​ប្រជាមានិត​ចិន​ចាប់ពី​ថ្ងៃទី​២២ ដល់ថ្ងៃទី៣០ ខែធ្នូ​ ឆ្នាំ២០២៤​។ ក្នុងនេះដែរ គណប្រតិភូ​ក៏បានធ្វើការស្វែងយល់ដកស្រង់បទពិសោធន៍ពីភាគីមិត្តចិន ក្នុងការងារគ្រប់គ្រងរដ្ឋនិងបក្សនៅថ្នាក់មូលដ្ឋាន ក៏ដូចជាកិច្ចការអភិវឌ្ឍជាតិនៅក្នុងការធ្វើទំនើបកម្មបែបចិន ដើម្បីជាមូលដ្ឋានគ្រឹះសម្រាប់កិច្ចសហប្រតិបត្តិការក្នុងការ កសាងសហគមន៍ជោគវាសនារួមកម្ពុជា -​ចិន​ ដែលមានគុណភាពខ្ពស់ កម្រិតខ្ពស់​ និងស្តង់ដាខ្ពស់ ដែលមានអនាគតរួមគ្នាក្នុងយុគសម័យថ្មី។នៅក្រុងឆុងឈីង គណប្រតិភូ​បាន​ជួបសម្តែងការគួរសម​ជាមួយលេខាបក្សរងក្រុងឆុងឈីង ភាគីទាំងពីរបានពិភាក្សាគ្នាយ៉ាងស៊ីជម្រៅ​ ផ្តោត​លើ​ការ​ផលិត​រថយន្ត​ ការគ្រប់គ្រងកំពង់ផែ កំពង់ផែតាមដងទន្លេរ យង់សេ ផ្លូវថ្នល់​ ផ្លូវដែក និងបណ្តាញដឹកជញ្ជូនតាមផ្លូវអាកាស។ លើសពីនេះគណប្រតិភូ ជួបពិភាក្សាការងារជាមួយលេខាបក្សស្រុកថុងណាន ដែលមានជំនាញដាំក្រូចឆ្មា និងស្ពៃចង្កឹះ ដែលផ្គត់ផ្គង់ប្រមាណ៥០%ក្នុង ប្រទេសចិន។គួរបញ្ជាក់ផងដែរថា ដំណើរទស្សនកិច្ចនេះ​ មិន​ត្រឹម​តែ​ពង្រឹង​កិច្ចសហប្រតិបត្តិការ​រវាងកម្ពុជា-ចិន​ លើវិស័យកសិកម្ម និងបច្ចេកវិទ្យាប៉ុណ្ណោះទេ ថែមទាំងបានចាក់គ្រឹះរឹងមាំ សម្រាប់ទំនាក់ទំនងវិនិយោគនិងពាណិជ្ជកម្មនាពេលអនាគតផងដែរ៕