កម្អែលភ្នំភ្លើងបានចាប់ផ្តើមផ្ទុះឡើងកាលពីថ្ងៃច័ន្ទ តាមរយៈសំបកនៃភ្នំភ្លើងដ៏សកម្មបំផុតមួយរបស់ពិភពលោក ដែលមានឈ្មោះថា Kilauea ស្ថិតនៅលើកោះដ៏ធំមួយរបស់ហាវ៉ៃ។

មជ្ឈមណ្ឌលអង្កេតភ្នំភ្លើង Hawaii បានរាយការណ៍ថា ការផ្ទុះនេះគឺស្ថិតនៅលើកំពូលភ្នំភ្លើង caldera ក្នុងតំបន់ដាច់ស្រយាល និងនៅជិតនិងឧទ្យានជាតិភ្នំភ្លើង Hawaii ។ វាបានធ្វើឲ្យមានរញ្ជួយដីដែលចាប់ផ្តើមនៅម៉ោងប្រហែល ២ ទៀបភ្លឺម៉ោងក្នុងស្រុក ហើយរយៈពេលប្រហែលកន្លះម៉ោងគេឃើញមានកម្អែលភ្នំភ្លើងដែលផុសឡើងតាមរយៈការប្រេះស្រាំនៅក្នុង caldera ហើយផុសមកដូចជាទឹក។

ក្រុមសង្កេតការណ៍បាននិយាយថា ការគំរាមកំហែងភ្លាមៗបំផុតគឺមកពីផ្សែងអ័ព្ទភ្នំភ្លើងដែលអាចទៅដល់លំនៅដ្ឋានដែលនៅផ្នែកខាងក្រោម។ ផ្សែងអ័ព្ទភ្នំភ្លើងបែបនេះមានផ្ទុកស្ពាន់ធ័រឌីអុកស៊ីត ហើយអាចធ្វើឲ្យរោគសញ្ញាកាន់តែអាក្រក់សម្រាប់អ្នកដែលមានបញ្ហាសុខភាពដូចជាជំងឺហឺត បញ្ហាផ្លូវដង្ហើមផ្សេងទៀត ឬជំងឺសរសៃឈាមបេះដូង។

គួររំលឹកផងដែរថា តំបន់​ដែល​ការ​ផ្ទុះ​កំពុង​កើត​ឡើងនេះ​ត្រូវ​បាន​បិទ​ជា​សាធារណៈ​តាំង​ពី​ឆ្នាំ ២០០៧ ដោយសារ​គ្រោះ​ថ្នាក់​ដែល​រួម​មាន​អស្ថិរភាព​ជញ្ជាំង​រណ្ដៅ ការ​បាក់​ដី និង​ការ​ធ្លាក់​ថ្ម។ ឧទ្យានជាតិភ្នំភ្លើង Hawaii គ្របដណ្តប់លើកំពូលភ្នំភ្លើងដ៏សកម្មបំផុតចំនួនពីររបស់ពិភពលោករួមមាន ភ្នំភ្លើង Kilauea និង ភ្នំភ្លើងMauna Loa៕