មហាជនអ្នកលេងបណ្ដាញសង្គមជាច្រើនកំពុងតែចាប់អារម្មណ៍ខ្លាំងនូវវីដេអូឃ្លីបមួយរបស់ អតីតតារាចម្រៀង លោក សាពូន មីដាដា បានលើកម្រាមដៃដប់សំពះសុំក្ដីអាណិតបណ្ដោះប្រណីពីសម្ដេចតេជោ ហ៊ុន សែន និងសម្តេចធិបតី ហ៊ុន ម៉ាណែត ដើម្បីសុំដីតូចល្មមស្ថិតនៅតាមបណ្តោយព្រំដែននៅក្នុងតំបន់ CLV រស់នៅ និងប្រកបរបរកសិកម្ម។

ក្នុងឃ្លីបនោះ លោកបាន​បញ្ជាក់ថា លោកមិនសុំអ្វីធំនោះទេត្រឹមទទឹង ១៥ ម៉ែត្រ និងបណ្តោយ ២៥ ម៉ែត្រនិងកូនផ្ទះតូចមួយ មិនថាជាប់ព្រំដែនវៀតណាម ឬ ព្រំដែនឡាវ នោះទេគឺលោកអាចរស់នៅបានទាំងអស់ ដើម្បីចូលរួមចំណែកបង្ករបង្កើនផលអភិវឌ្ឍន៍សេដ្ឋកិច្ចធន់តូច តាមលទ្ធភាពដែលអាចធ្វើទៅបាន ក៏ដូចជាបានរួមចំណែកក្នុងការចូលរួមកសាងអភិវឌ្ឍន៍ការពារព្រំប្រទល់ ការពារជាតិប្រទេសជាតិយើង បន្ថែមពីនេះ លោក សាពូន មីដាដា ក៏បានដេញហ្គឺតាច្រៀងចម្រៀងមួយបទចំណងជើងថា «ពុកអើយម៉ែអើយ» ក្នុងឃ្លីបវីដេអូមួយនេះថែមទៀតផង។

គួរបញ្ជាក់ផងដែរថា លោក សាពូន មីដាដា ជាអតីតតារាចម្រៀងដ៏មានប្រជាប្រិយភាពមួយរូបនៅក្នុងផលិតកម្មហង្សមាស មានបទចម្រៀងជាច្រើនពិរោះៗទទួលបានការគាំទ្រខ្លាំងពីមហាជន នាពេលនោះតារាចម្រៀងរូបនេះមានជីវភាពធូរធារ តែបែជាស្ងប់ស្ងាត់អស់រយៈពេលជាច្រើនឆ្នាំធ្លាក់ប្រជាប្រិយភាព ជីវិតគ្រួសារក៏បែកបាក់មិនសមប្រករប ទើបធ្វើឲ្យជីវិត និងជីវភាពរបស់គាត់ហាក់មានភាពលំបាកមកទល់ពេលនេះផងដែរ៕ សម្រួលដោយ៖ Sun Darasy